La Xunta pola Defensa de la Llingua Asturiana, l’asociación Caveda y Nava, l’Academia de la Llingua, l’Aconceyamientu de Xuristes pol Asturianu y una representación del Gobiernu asturianu aconceyó esti xueves 7 de xunetu en Madrid col Comité d’Espertos pal siguimientu de la Carta de les Llingües Minoritaries del Conseyu d’Europa.
Dende la Xunta pola Defensa de la Llingua quixeron tresmitir a les autoridaes europees la necesidá d’un marcu xurídicu que permita asegurar «derechos fundamentales a la ciudadanía». Según la XDLA, los datos presentaos pol Gobiernu asturianu, que tamién participó nel conceyu, «pa xustificar la so supuesta política llingüística», son un «llaváu de cara» pa tapar la parálisis na normalización y tol tiempu ensin nengún avance significativu nuna situación «de desigualdá xurídica».
Amás, la XDLA fixo referencia a los «constantes problemes» en toles etapes del sistema educativu y «l’ataque» a la investigación n’asturianu nel ámbitu universitariu, tema anguaño d’actualidá depués de que’l borrador del Reglamentu de Doctoráu recoyera que les tesis presentaes en cualquier facultá teníen de redactase en castellanu o en dalgún de los idiomes oficiales de la Unión Europea, imposibilitando l’usu del nuestru idioma. «El derechu al estudiu y la investigación universitaria nel propiu idioma ta recoyíu específicamente na Carta del Conseyu d’Europa. Por eso, demandamos de la Universidá asturiana un Reglamentu que recueya y afite, ensin nenguna dulda, l’usu del idioma nes tesis, cualquier que sía’l campu o área de conocimientu», sentencien dende la XDLA.
Per otru llau, dende l’asociación Caveda y Nava tresmitió-y al Comité qu’hai motivos pa quexase pola situación del asturianu, pero existe’l problema de la falta d’un consensu políticu nel que tolos partíos entiendan que’l nuestru idioma ta en peligru y necesita midíes que lu protexan. Otra manera, tamién comentaron a los espertos europeos qu’una de les cuestiones que supón un problema mayor ye que ye la mesma ciudadanía la que da’l so apoyu a partíos políticos que nun tán pola oficialidá.
(de Les Noticies, 08-07-2011)
Tierra alantre, la mesma fala 
Deixar ua Respuosta