LMS
El premiu que concede l’alcuentru lliterariu L’Arribada a escritores n’asturianu o gallego-asturianu, foi a parar esti añu a Vicente García Oliva. Nesta edición, a la que podíen presentar candidatures persones o colectivos, concursaben autores nacíos primero de 1961.
La distinción, que se va entregar el prósimu 17 de setiembre nel marcu de L’Arribada 2011, consiste nuna pintura cerámica del escultor y ceramista xixonés Jesus Castañón. El xuráu, qu’aconceyól miércoles 3 d’agostu, taba formáu por Alberto Álvarez Peña, Fernando de la Fuente, Aurora García Rivas, David M. Rivas y tuvo presidíu por Humberto Gonzali.
Los ganadores d’ediciones anteriores del Premiu Timón fueron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009) y Roberto González-Quevedo (2010).
Vicente García Oliva (Xixón, 1944) ye ún de los fundadores de Conceyu Bable y miembru de númberu de l’Academia de la Llingua Asturiana, onde dirixe la Colección de Lliteratura Xuvenil y forma parte del conseyu de redacción de la revista Lliteratura. Amás, ye patronu fundador de la Fundación Caveda y Nava y collaborador habitual de la revista CLIJ. Per otra parte, García Oliva forma parte de la primer xeneración del Surdimientu y tien una más d’una ventena de llibros publicaos n’asturianu y castellanu, nos que cultiva tanto la lliteratura infantil como la novela policiaca o l’ensayu. Ye tamién ganador de diversos premios lliterarios: el Premiu Llectures pa Rapazos de l’Academia de la Llingua Asturiana; el Premiu Montesín de la Editorial Trabe; y el Premiu de la Crítica d’Asturies, ente otros.
(de Les Noticies, 04-08-2011)
Tierra alantre, la mesma fala 
Deixar ua Respuosta