DAMIÁN BARREIRO
La Casona de Campumanes de L.lena acoyó esti 25 d’ochobre la presentación la segunda edición de N’asturianu queda guapo. La campaña consiste en seis carteles con vocabulariu específicu sobre la ribera, el monte, les partes del cuerpu, les estaciones del añu, la ropa y la casería. Los materiales tán dedicaos a los más pequeños y son un recursu didácticu pa les escueles. Otra manera, un día enantes, la Mancomunidá Comarca de la Sidra, presentó na sé de la Mancomunidá, en Paraes, dos campañes n’asturianu rellacionaes cola protección y respetu al mediu ambiente.
La campaña l.leniza usa’l vocabulariu de la variante llingüística del conceyu cola intención de reforzar l’asturianu de la zona, empezando pelos más pequeños. Los materiales van repartise nes escueles del conceyu y nes guarderíes. Na presentación contóse cola presencia del autor de los materiales Sidoro Villa Costales, escritor y dibuxante con obres como Nun-yos tengas perceguera o Evaristo Valle, el pintor del antroxu; el conceyal d’Educación y Política Llingüística, Rolando Díaz; y la responsable del Serviciu de Normalización Llingüística, Penélope Miranda. Amás d’esta campaña tamién van presentase otros recursos didácticos como dos xuegos sobre animales y plantes y unes mariquites recortables pa trabayar el vocabulariu de la ropa. Tolos materiales tán subvencionaos pola Conseyería de Cultura.
Otra manera, la campaña de la Comarca de la Sidra ta sacada en comuña col Conceyu de Piloña y ta empobinada al comerciu. Trátase de bolses ecolóxiques que se van repartir ente los clientes de los comercios que tean interesaos en esparder la campaña. Asina, consiste en bolses reciclables, col lema Reduz, reutiliza, recicla, que puen reutilizase les veces que se quiera, en cuenta de les bolses de plásticu contaminantes habituales nos comercios. La ciudadanía d’estos conceyos tamién va tener a la so disposición bolses específiques destinaes a separar la basura convenientemente pal so recicláu, nos tres colores propios de cada tipu de residuu, amás de llibretines de notes con conseyos rellacionaos col reciclaxe y el consumu responsable y carteles que traten de concienciar a la xente de la importancia del reciclaxe. El repartu va facese nes dependencies de les cases conceyu y nos comercios que tean interesaos, amás d’a traviés del Serviciu de Normalización Llingüística de la Comarca de la Sidra.
(de Les Noticies, 26-10-2011)
Tierra alantre, la mesma fala 
Deixar ua Respuosta