El Conceyu de Samartín del Rei Aurelio presentó esta selmana les X Xornaes de Lliteratura Infantil y Xuvenil, entamaes dende la Conceyalía de Cultura, al traviés de la Oficina de Normalización Llingüística. La novedá esti añu ye l’usu, pela primer vez, de la llingua asturiana en toles actividaes d’estes xornaes. Tol programa va desendolcase na Casona del Bravial, en Blimea, a les 19:00 hores.
Los actos van empecipiar el martes 22 de payares, cola presentación del llibru A pespunte, de Montserrat Garnacho, obra ganadora del premiu María Xosefa Canellada 2010 concedíu pola Conseyería de Cultura y Turismu del Principáu d’Asturies y editáu por Trabe.
Na xornada del 23 de payares, el profesor Jesús Rodríguez Martínez va presentar el so proyectu Ciencia y Filosofia n’asturianu, una publicación en llingua asturiana destinada al alumnáu de primaria y secundaria, cola que se pretende que los mozos vaigan familiarizándose con dellos conceptos científicos y corrientes del pensamientu. El material ta espublizáu na Revista de Biblioteques Escolares @bareque, promovida pol portal educativu Educastur. El día 29 de payares, l’escritor Chechu García va ufiertar una charla sobre la historia del cómic asturianu, onde va repasar la evolución d’esti arte dende hai más de cien años.
Tamién nel marcu d’estes xornaes ta incluída la esposición del ilustrador Sidoro Villa Costales, una muestra onde puen vese los dibuxos orixinales fechos por esti autor sierense en delles publicaciones. La esposición va poder visitase na Casona del Bravial de Blimea hasta’l próximu 9 d’avientu, de llunes a vienres, n’horariu de 10:00 a 14:00 hores y de 17:00 a 20:00 hores.
(de la Estaya d’Asturianu de la RTPA, 11-11-2011)
Tierra alantre, la mesma fala 
Deixar ua Respuosta