Ámbitu presenta «Chatarrona», la primer webserie n’asturianu

Ámbitu ta estos díes d’estrena gracies a un proyectu audiovisual nuevu: la comedia de situación Chatarrona. Responsable de les primeres temporaes de los programes de TPA Camín de Cantares y Pieces, Ámbitu decidió, pal llanzamientu d’esti productu de ficción n’asturianu, nun echar mano de los medios convencionales y estrenar namás n’Internet al traviés del sitiu web chatarrona.com, onde yá se puen ver los tres primeros capítulos –de diez minutos caún– d’esta serie escrita y dirixida por Alberto Suárez y protagonizada por Masokhna Diop, Pedro Durán, Juana Marrón y Alberto Rodríguez. Escoyendo esta canal de difusión, bona d’esparder al traviés de les redes sociales, la serie tenta de llegar a asturianos auquiera que vivan.

La producción de Chatarrona pue calificase de low cost, porque se fixo con un presupuestu baxu pa lo que suelen costar esti tipu de productos audiovisuales, pero dafechamente con profesionales –tanto na parte técnica como d’interpretación– que desenvuelven el trabayu n’Asturies. Na escoyeta de los actores, optóse por combinar la esperiencia de Pedro Durán y Alberto Rodríguez –bien conocíos pola so participación en programes de TPA como Terapia de Grupo o El Chigre– cola frescura y solvencia de Juana Marrón y el debú de Masokhna Diop, dos intérpretes que desenvuelven nesta serie un repertoriu bien grande de rexistros espresivos.

Comedia social

Chatarrona ye una comedia gris, urbana y contemporánea, que cuenta la historia de dos amigos nuna situación desesperada: Chuso (Alberto Rodríguez) y Esteban (Pedro Durán) viven nun apartamentu propiedá de los padres de Chuso que yá nun usen porque compraron un pisu meyor. Al ser una vivienda de la familia, nun paguen renta, namás los gastos, pero entrambos dos tán al paru y yá nun tienen derechu a prestaciones económiques, así que Chuso decide que la meyor manera de sacar perres ye poner un anunciu pa garrar posaderos que quieran compartir pisu y, de pasu, aprender un idioma, l’asturianu. Un negociu basáu nos típicos programes internacionales, pero aplicáu a Asturies.

Chuso ta mui ilusionáu, pero Esteban ye mui escépticu col presuntu negociu. Esteban ta mui deprimíu desque perdió’l trabayu, la vida regalada que llevaba como presentador estrella de la tele, la fama y almiración de los telespectadores, y agora vive pendiente d’una llamada de teléfonu del so axente que lu devuelva a los platós y a los prime time. Por fin, l’anunciu de Chuso tien efectu y dos persones interesaes nel tratu lleguen a la so casa y a les sos vides, Carolina (Juana Marrón) y Malik (Masokhna Diop).

Carolina, depués de rodar per media Europa, volvió a Asturies hai menos d’un añu y quier aprender asturianu bien –un poco yá lo entiende, al ser fía d’asturiana– porque-y parez bien triste dominar cuatro idiomes y nun facer lo mesmo cola llingua materna. Carolina trabaya dende casa programando páxines web y tamién fai trabayos de manager. Pero lo que más-y gusta a Carolina ye’l mundu del espectáculu, el teatru, poder llegar a ser actriz. Malik tamién quier aprender asturianu –tamién sabe un poco porque trabaya nuna sidrería–, pero quier sabelo bien porque quier optar a meyores oportunidaes llaborales n’Asturies. Malik tien más hermanos viviendo n’Europa pero tien a so padre y so madre en Senegal.

Les situaciones que viven estos cuatro personaxes faen de Chatarrona un retratu social d’Asturies, onde rescamplen los contrastes que xenera la crisis económica. La serie xuega con referencies a l’actualidá informativa, la historia de la llucha obrera nel país, los ídolos deportivos nuevos o los conflictos sociales –como’l machismu o’l racismu– col oxetivu d’esplotar un humor tan nuestro como único en mundu, al mesmu tiempu que da una visión positiva del procesu de recuperación llingüística.

(de Les Noticies, 13-12-2011)