Presentóse la primer tesis tramitada n’asturianu

El pasáu vienres 16 d’avientu foi l’actu de llectura y defensa de la tesis doctoral de Xuan Santori Vázquez, titulada El papel de los escritores del Surdimientu na recuperación del asturianu: la visión del escritor y dirixida pol profesor Ramón d’Andrés Díaz. Trátase d’una tesis redactada en llingua asturiana y la primera qu’usó esti idioma dafechu a lo llargo de tola so tramitación. El tribunal que xulgó la tesis dio-y una nota de Sobresaliente Cum Laude. El tribunal tuvo presidíu pol catedráticu asturianu afincáu na Universidá del País Vascu Francisco José Llera Ramo, autor d’importantes trabayos sobre sociollingüística asturiana.

El doctorandu Xuan Santori Vázquez fixo la defensa de la so tesis n’asturianu, llingua que tamién usó una parte del tribunal. Dase la circunstancia de qu’esta tesis doctoral ye la primera que se tramitó dafechu en llingua asturiana, acoyéndose al nuevu reglamentu que’l Rectoráu aprobó nesti mandatu, fechu que destacó’l tribunal calificador. Precisamente, la primer tesis n’asturianu defendióla na Universidá d’Uviéu en 1988 Ramón d’Andrés y dirixóla Ana Cano, actual presidenta de l’Academia de la Llingua.

La investigación de Xuan Santori Vázquez, filólogu y escritor, refierse a la influencia de los escritores n’asturianu nel movimientu lliterariu y sociocultural llamáu Surdimientu, que ‘principió nel añu 1974 y llega hasta güei. Esta influencia estúdiala Xuan Santori al traviés de la percepción de los propios escritores, gracies a los datos llograos nuna macroencuesta fecha a prácticamente tolos escritores n’asturianu. La gran cantidá de datos estadísticos permiten facer un retratu escepcional de les interioridaes y característiques del mundu lliterariu asturianu nos últimos 30 años. Tal como destacaron dellos miembros del tribunal, la metodoloxía utilizada nesta investigación ye mui novedosa y podría aplicase tamién a otres situaciones de lliteratures minoritaries.

(de Les Noticies, 19-12-2011)