El poeta ayandés Elías Veiga acaba de ganar el Premiu Teodoro Cuesta de Poesía, qu’anguaño cumplía les 21 ediciones. El xuráu, reuníu na Casa la Cultura de Mieres la tarde del llunes 19 d’avientu, decidió conceder por unanimidá’l premiu de 4.000 euros al poemariu tituláu Testamentu, d’Elías Veiga.
Elías Veiga (Presnes, Ayande, 1972) ye encargáu del Archivu Municipal de Tinéu y de la Casa la Cultura de Navelgas. Publicó’l primer poemariu nel 2004, La tierra fonda (Trabe), al que siguió cuatro años depués Robinson astur (Universos), obra que ganó’l Premiu de la Crítica de l’Asociación d’Escritores d’Asturies. Nel 2011 ganó la VIII edición del Concursu de Cuentos Curtios d’Adultos de Cangas del Narcea col rellatu «Tierra adientro».
El xuráu del Premiu Teodoro Cuesta de Poesía tuvo integráu nesta edición por María Antonia Pedregal, directora de la Oficina de Política Llingüística; Jesús Fernández, director de la revista Biblioasturias; Ismael María González Arias, escritor y director de la Casa la Cultura de Mieres; Esther Prieto, escritora, ganadora d’esti premiu na edición de 1998 y responsable d’Ediciones Trabe; y Xuan Bello, escritor y ganador d’esti premiu na edición de 1993. Presidió’l xuráu’l conceyal de Cultura y vicealcalde de Mieres Manuel Ángel Álvarez.
(de Les Noticies, 20-12-2011)
Tierra alantre, la mesma fala 
Deixar ua Respuosta