DAMIÁN BARREIRO
El director xeneral de Política Lingüística, Alfredo Álvarez, va presidir esti 22 d’avientu, na sé de la Conseyería de Cultura, el conceyu de la Xunta Asesora de Toponimia, lo que supón la primer reunión d’esta entidá dende’l cambiu de Gobiernu y col director nuevu nel cargu. A ella van asistir tamién el director xeneral d’Ordenación del Territoriu y Urbanismu, José Miguel García, y la directora d’Alministración Local, Cristina Bellón.
La Xunta Asesora de Toponimia del Principáu d’Asturies ye un órganu dependiente de la Conseyería de Cultura y Deportes que s’ocupa de tolo relativo a la recuperación y normalización de los nomes tradicionales de los llugares d’Asturies. Na so etapa actual, la Xunta Asesora de Toponimia constituyóse nel 2004 y celebró la primer sesión de trabayu en mayu d’esi añu. D’entós p’acá, protagoniza, xunto a los conceyos, un llabor históricu al cumplir l’oxetivu de convertir n’oficiales los topónimos d’Asturies.
Nesti 2011, el procesu de recuperación de la toponimia asturiana vivió una de les époques de menor actividá de los sos siete años d’historia: anguaño namás s’aprobó’l decretu de Ponga, nel mes de febreru. El parón nel procesu vieno pol cambiu de Gobiernu y la necesidá de nomar miembros nuevos que conformen la Xunta Asesora de Toponimia –onde ta representáu’l Gobiernu, l’Academia de la Llingua Asturiana, Universidá y RIDEA–. Espérase que nesta primer Xunta de la llexislatura se nomen o renueven los miembros d’esta entidá.
A pesar del parón na Xunta de Toponimia, el trabayu d’encuestación siguió hasta’l momentu’l en munchos conceyos del país, como Salas, que solicitaron hai tiempu l’apertura del espediente. Con esti, sumen 14 los conceyos que tienen esti procesu empezáu: ún con dictame definitivu –Santu Adrianu– y 11 en distintes fases del procedimientu. Otra manera, hai 25 conceyos asturianos que tovía nun solicitaron empezar el procesu.
(de Les Noticies, 22-12-2011)
Tierra alantre, la mesma fala 
Deixar ua Respuosta