La revista «Formientu» celebra cinco años

La revista lliteraria Formientu va despidir l’añu y a dellos de los sos autores más vieyos nun actu que se va celebrar nel chigre L’Ayalga (c/ Prendes pando 11, Xixón), el xueves 29 d’avientu, a les 20:00 hores. L’actu va valir tamién pa recaudar fondos pa l’asociación Iniciativa pol Asturianu, creada va poco, pos tolos ingresos pola venta de revistes que se faigan esi día van tar destinaos al llabor d’esta organización.

Xareos! Xestión Cultural ye la entidá responsable de la publicación de Formientu, que cumplió apocayá cinco años, con una periodicidá biañal. Depués d’esti tiempu, y col oxetivu de caltener vixente’l subtítulu de «Revista de lliteratura mui moza», llegaba’l momentu de dicir adiós a dellos de los sos collaboradores, qu’entamaron siendo bien mozos y que tienen yá encadarmada una carrera lliteraria, con premios y volúmenes propios nel mercáu en munchos casos.

«La renovación xeneracional ye imprescindible nuna publicación d’estes característiques, pos ye la so esencia mesma la que cuerre peligru si nun tamos atentos a la incorporación de los autores más nuevos», señalen dende’l conseyu editorial de la revista. Por eso, dende’l númberu diez van poder publicar testos los autores nacíos dende 1980 n’adelantre, eliminando cinco años la edá máxima permitida pa la publicación na revista.

Otra manera, nesti númberu incluín la novedá d’estrenar la estaya de crítica, feches por Iván Cuevas y José Ángel Gayol sobre Les últimes pallabres y Pequeñu álbum de familia. Amás, nesti númberu apaecen poemes de Pablo Rodríguez Medina, Xurde Fernández, Ricardo Candás y Héctor Pérez Iglesias. Los testos narrativos son d’Abel Martínez, Jorge Fernández García, Pablo A. Quiroga Prendes, Rubén Rey Menéndez y Inacio Rodríguez-Solar.

(de la Estaya d’Asturianu de la RTPA, 27-12-2011)