La Xunta pola Defensa de la Llingua Asturiana (XDLA) denuncia la deturpación de les formes toponímiques asturianes nes etapes de la Vuelta Ciclista a España que pasen per Asturies y pide la intervención de la Xunta Asesora de Toponimia. El detonante d’esa denuncia ye la novedá d’anguaño: la xubida al picu de Cuitunigru, na estación d’esquí de Payares. Na organización de La Vuelta, y polo tanto nos medios, yá se tán usando formes pa llamar al final d’etapa como Cuitu Negru o Cuitu Negro.
La XDLA recuerda que tamién hai otra llegada n’Asturies, nos llagos d’Enol y La Ercina (Cangues d’Onís), pa los que s’espardió dende va años la forma ensin base popular Lagos de Covadonga. El problema, amás, nun se reduz a los finales d’etapa, sinón que los pasos per otros altos popularicen formes deturpaes como Alto de San Lorenzo (que sustitúi al popular San L.lourienzu o San L.laurienzu), Alto de Tenebredo (pol nome del pueblu de Tenebreo) o Alto de Ortiguero (pol tradicional de H.ortigueru).
La XDLA considera que ye’l momentu de que la Xunta Asesoria de Toponimia intervenga énte los organizadores de La Vuelta «pa que se respeten los nomes auténticos igual que se fai nes etapes gallegues, catalanes, vasques, etc., porque depués de la popularización nos medios de formes enquivocaes ye mui difícil volver a recuperar les reales, les qu’usó la población local hasta que se fixeron famoses». «Si nel casu de L’Angliru se respetó la forma tradicional, nun s’entiende que nel casu de Cuitunigru namás se respete na primer metá del topónimu», denuncia la XDLA. Pa esta organización ciudadana, «ye una bona oportunidá de facer llegar a un bon númberu de xente’l valor de la toponimia tradicional asturiana» y anima a la Xunta de Toponimia «a completar los espedientes toponímicos de tolos conceyos y ponese a trabayar con otru tipu de topónimos con menos implicaciones llegales o reglamentaries como son los accidentes xeográficos».
(de Les Noticies, 12-01-2012)
Tierra alantre, la mesma fala 
Deixar ua Respuosta