L”Asociación de Trabayadores de la Normalización Llingüística denunció esti martes públicamente que nesti momentu cuatro servicios de normalización llingüística permanecen zarraos, de lo que culpa a “la desconsideración, dexadez y falta de compromisu de los responsables de los conceyos” onde s”ubiquen. Asina, recuerda que la situación repítese tolos años en dellos conceyos que nun se quieren facer cargu d”esta prestación “mientres nun tengan les perres que los financien na mano”.
Al traviés d”un comunicáu, l”asociación esplica que “al empiezu del 2012 vemos cómo la Oficina de Normalización Llingüística del Conceyu de Llaviana, la de Corvera y la Oficina Cultural y Lingüística da Mancomunidá Ozcos-Eo tán ensin actividá nin trabayadores, amestándose asina al pieslle nel mes d”agostu de 2011 del Serviciu de Normalización Llingüística de Mieres”.
“Nun entendemos”, señala l”asociación, “por qué unos conceyos tienen el so SNL abiertu tol añu mientres Llaviana, Corvera y Ozcos-Eo, esti añu, y Mieres o la Mancomunidá del Sueve, n”exercicios pasaos, cadecen la desconsideración, dexadez y falta de compromisu de los responsables de los conceyos, que nun se quieren facer cargu d”estos servicios y los sos trabayadores mientres nun tengan les perres que los financien na mano”.
El colectivu recuerda que lleva nueve años “trabayando p”atopar soluciones a la inestabilidá llaboral y a la temporalidá de los SNL, presentando propuestes a la Dirección Xeneral de Política Llingüística pa camudar esta situación. La respuesta nestos años últimos foi inorales y nun apurrir soluciones a los problemes que vienen denunciando”.
Amás, entiende que”l pieslle de los Servicios de Normalización Llingüística de Llaviana, Corvera, Mieres y de la Oficina Cultural y Lingüística d”Ozcos-Eo esti añu “tien un problema amestáu, y ye que nestos meses pasaos estos SNL desarrollaron, diseñaron y executaron diferentes campañes de normalización social del asturianu y del gallego-asturianu que se tienen que xustificar ante la dirección xeneral de Política Llingüística enantes del final de xineru del 2012. ¿Cómo se va facer esti llabor si nun hai personal nin actividá nestos servicios?”.
“D”esta miente ta parándose, con una falta clara de compromisu, el trabayu pola normalización y dignificación del asturianu y del gallego-asturianu, situación a la que ha pone-y fin l”acción decidida de la Dirección Xeneral de Política Llingüística, acullá de continxencies polítiques o presupuestaries del momentu nel que tamos”, exixe”l colectivu.
(de La Voz de Asturias, 17-01-2012)
Tierra alantre, la mesma fala 
Deixar ua Respuosta