Sanfonices

L Centro de Música Tradecional Sonidos de la Tierra (CMTST) apersentou al público, dous nuobos CDs que resúltan dun trabalho de recolha de l patrimonho musical de la Tierra de Miranda i que benirun anriquecer l spólio çcográfico de l centro i perpetuar la traiçon oural mirandesa.

L lhançamiento de ls trabalhos çcográficos “Sanfonices” i “Camín Cantares ” decorriu na aldé raiana de Custantin, ne l cunceilho de Miranda de l Douro i acuntece nua altura an que fúrun cortados apoios anstitucionales al CMTST.

“La recolha fui apersentada ne l decurso de l radadeiro festibal Antercéltico de Sendin i, cumo tubo un acolhimiento caloroso por parte de l público, resolbimos fazer ua grabaçon, dous meses depuis de l’acuntecimiento, para assi perpetuar las músicas cantadas al sonido de la sanfona, para quedarmos cun un registo testemunhal dun cuncerto único”, dixo l diretor de l CMTST, Mário Correia.

Sanfonices ye un porjeto de trés musiqueiros mirandeses (Célio Pires, António Garcia i Sérgio Martins) i percura recuperar i dar a coincer remances i cantigas d’ambalar que éran cantadas ne ls serones i nas lhides de l campo nas aldés de la Tierra de Miranda.

Ls temas ancluídos ne l trabalho son todos de la recolha de la tradiçon oural i adonde figúran musicas amblemáticas de l cancioneiro regional mirandés cumo l Ró Ró, Perlimpinchin, Çarandilhera, La Lhoba Parda, Ls Cardadores ó las Cantigas de la Segada, antre outros.
“Son cantigas muitas bezes squecidas pus ténen ua rítmica pouco fuorte i lhenta, l que faç cun que la mocidade olhe para eilhas cun algun çdén. De l nuosso punto de bista, trata-se de spécimes mui ricos, subretodo pulas stórias que cúntan”, acrecentou Mário Correia.
Segundo alguns specialistas, la sanfona nun ye un strumiento “quemun na música tradecional mirandesa”. Mas, diç la stória qu’habie muitos tocadores deste strumiento que fazíen ls Caminos de Santiago, habendo registos d’alguns deilhes na Tierra de Miranda.

“Trata-se dun strumiento antroduzido hai pouco tiempo na música tradecional mirandesa, habendo yá un cunjunto d’anstrumentistas qu’ampeçou a adotar la sanfona pa ls sous porjetos musicales, l que bieno anriquecer l patrimonho musical de la region”, cuncluiu Mário Correia.

Las sanfonas outelizadas ne l cuncerto son fabricadas por un de ls eilemientos de l grupo, na pequeinha aldé mirandesa de Custantin.

(de Froles Mirandesas, 24-01-2012)