La Conseyería d’Educación y Universidaes y la escuela pública Horacio Fernández Iguanzo de La Foz (Morcín) acaben d’entamar el primer concursu artístico-literariu Marcos Requejo. Esti concursu va facese n’asturianu ente los escolares d’Educación Primaria y ta entamáu cola collaboración del Conceyu de Morcín y l’Academia de la Llingua Asturiana.
El certame lleva’l nome d’un profesor d’asturianu nesa escuela que perdió la vida hai cuasi dos años en Los Picos d’Europa. La escuela recordó la figura d’esti maestru al traviés d’un memorial deportivu na so alcordanza y poniendo’l so nome al aula de Llingua Asturiana. Según indiquen dende la Conseyería, «la so apasionada defensa de la llingua y la so difusión ente los escolares más mozos, la so implicación col proyectu del centru y la viva participación nes actividaes estracurricualres valen d’exemplu pa tola comunidá educativa».
El concursu, que busca favorecer les rellaciones ente los miembros de la comunidá educativa, ta abiertu a tolos alumnos de Primaria y tolos trabayos tienen que tar escritos n’asturianu. Cada añu, el certame va tar dedicáu a ún bloque temáticu, como Música y cultura tradicional asturiana –que va ser el tema d’esta primer edición–, Salíes a los alredores y Actividaes deportives.
Los alumnos del primer ciclu de Primaria van poder participar con un dibuxu, mentes que los del segundu van tener que facer un microrrellatu con 140 caracteres como máximu. Otra manera, la estensión pal tercer ciclu ye llibre. Los trabayos van tener que presentase enantes del 29 de febreru y el xuráu va dar el dictame’l 15 de marzu. La entrega de premios va ser el 28 de marzu nun actu entamáu pola Conseyería na escuela morciniega.
(de Les Noticies, 31-01-2012)
Tierra alantre, la mesma fala 
Deixar ua Respuosta