DAMIÁN BARREIRO
Ángela Sánchez Vallina, responsable de la editorial Pintar-Pintar y ex-presidenta del Gremiu d’Editores, afirma qu’ensin subvenciones nin compres públiques «los llibros editaos n’asturianu –polo menos, los que son en papel– van camín de la desaparación». Les declaraciones de Vallina a Les Noticies prodúcense nel periodu actual d’inseguranza que vive la industria cultural n’asturianu énte una situación de prórroga presupuestaria y d’adelantu electoral.
Too ello supón un parón na actividá económica y nes inversiones del Gobiernu asturianu, que puen provocar que l’Executivu actual nun convoque enantes del 25 de marzu les llinies de subvenciones en réxime de concurrencia competitiva pal asturianu. Al parón actual podría amestase’l que vendría depués de les elecciones, con un Gobiernu en funciones y otru entrante que, amás, tendría un plazu pa conformar la estructura del Executivu. Por eso, el peligru de que colos plazos les subvenciones puedan perdese, o que s’aproveche la situación económica pa quitales, mantién en situación d’alerta al texíu empresarial n’asturianu.
Asina, Vallina diz que nestos momentos les Alministraciones, «de cualquier color», tán recortando partíes qu’hasta agora «yeren sagraes». Por eso, diz que nun esperen meyor suerte pa los llibros y opina que, nel casu de llingües minoritaries como l’asturianu, la solución pue ser el llibru dixital: «Que tien precios mui axustaos, ensin almacenes, y distribuíos dende un portal común y especializáu».
Otra manera, afirma que dende la so empresa lleven tiempu defendiendo la necesidá d’estructurar les subvenciones a la edición n’asturianu, «qu’agora son a fondu perdíu». «Diba ser muncho meyor garrar el modelu del Ministeriu de Cultura: dante un dineru pa editar un llibru y empara vuélves-yos l’equivalente en llibros que se destinen a biblioteques. Esto ye una inversión y permite que tengamos visibilidá, dalgo que necesitamos muncho», esplica Sánchez Vallina.
(de Les Noticies, 07-02-2011)
Tierra alantre, la mesma fala 
Deixar ua Respuosta