Pablo Quiroga: «Ensin ayudes, la producción n’asturianu diba ser muncho menos»

DAMIÁN BARREIRO

Pablo Quiroga, responsable d’Algamar Producciones, esplica que la venta de discos n’asturianu muévese nun mercáu reducíu, «lo que fai que sía dalgo complicao que sían rentables y que se cubran los costos de producción de discu, polo que ye necesariu l’apoyu de les instituciones». Asina, esplica que si nun hai nenguna subvención habría qu’editar munchos menos productos y qu’estos foren más comerciales: «Que sían rentables y que nun xeneren perdigues». El productor discográficu y realizador audiovisual refierse asina a la posibilidá de que’l Gobiernu asturianu nun convoque les subvenciones a la industria discográfica n’asturianu enantes del 25 de marzu –fecha de les elecciones autonómiques–, lo que podría facer que’l Gobiernu entrante nun tuviera en plazu pa convocales y axudicales o decidiera eliminales aprovechando la coxuntura económica.

Quiroga ye ún de los pocos directores de cine qu’utiliza l’asturianu nes sos producciones. L’añu pasáu, la pequeña industria audiovisual n’asturianu existió gracies a una partida de 22.500 euros de la Conseyería de Cultura, que destinó subvenciones en réxime de concurrencia competitiva a la qu’accedieron producciones como’l curtiumetraxe de ficción Sangre, de Ramón Lluis Bande; la web-serie Chatarrona; los documentales Xentiquina. Una ferramienta pedagóxica al serviciu d’Asturies –del mesmu Quiroga– y Eu soi quen fun, de Melania Fraga; o los doblaxes al asturianu de McLintock y Popeye.

Pal productor y realizador, ensin estes partíes ye mui complicao qu’un director de cine s’arriesgue a facer un productu audiovisual n’asturianu: «Namás díbemos facelo les persones más comprometíes col idioma, que vamos siguir trabayando n’asturianu, pero que los demás lo faigan ye dalgo inviable cuando’l mundu audiovisual ta más fuera d’Asturies que dientro». Asina, esplica que la xente ayeno a la reivindicación llingüística ve’l problema de que nun va poder mover les sos producciones pelos festivales del Estáu, «cuando existe’l subtituláu al castellanu o al inglés, igual que faen los catalanes col so cine», añade Quiroga.

(de Les Noticies, 09-02-2012)