IVÁN G. FERNÁNDEZ
La Conseyería de Cultura acaba de dar a conocer los grupos finalistes de la VI edición del Premiu al Meyor Cantar en llingua asturiana o gallego-asturianu. Un xuráu formáu por espertos en música y llingua escoyó a los cinco finalistes, que van actuar en directo esti sábadu 25 de febreru, por cuenta del Día Internacional de la Llingua Materna, na Gala d’Entrega del Premiu, que, amás, va retresmitise en directo pela TPA. L’actu va empezar a les 19 hores nel Teatru de la Llaboral, en Xixón.
Alfredo González, col tema «Felina bipolar»; Asturiana Mining Company, con «Si nun conoces Val.louta»; Bacotexo, cola canción «Campos de meiz»; Xera, con «Yo quixera…»; y Macadamia, con «Altanera», son los grupos finalistes que van concursar na gala. L’espectáculu de La Llaboral va ciarrase cola actuación de Skama la Rede, grupu ganador de la edición anterior. El grupu o intérprete ganador va representar a Asturies nel Festival de la Canción en Llingües Minoritaries (Liet Internacional), organizáu pol Conseyu d’Europa.
El Premiu al Meyor Cantar nació nel añu 2007 como reconocimientu del Gobiernu d’Asturies a la creación musical en llingua asturiana o gallego-asturianu.
(de Les Noticies, 14-02-2012)
Tierra alantre, la mesma fala 
Deixar ua Respuosta