La estaya de mocedá de la Xunta pola Defensa de la Llingua Asturiana, Xunta Moza, convoca la tercer edición del concursu lliterariu Declara’l to amor pola llingua por cuenta del Día Internacional de la Llingua Materna.
El concursu consiste en pensar nuna frase, eslogan o microrrellatu con menos de 140 caracteres y unvialo al corréu amorpolallingua@gmail.com o al traviés de Twitter usando’l hashtag #amorpolallingua (nesti casu, con menos de 124 caracteres). Tamién se pue mandar per vía postal a Xunta Moza, La Gascona 12, 3.u , 33001, Uviéu. El plazu acaba’l 21 de febreru. El tema tien que tar vinculáu a cualquier aspectu llingüísticu o sociollingüísticu d’Asturies y pue escribise en prosa o en versu. Cada participante pue presentar tantes obres como-y preste.
La obra premiada va dase a conocer nun actu cultural que se va celebrar el día 23 de febreru, a les 21 hores, nel CSOA La Madreña d’Uviéu. La organización pide por eso a tolos participantes qu’asistan a esta entrega del premiu, que va ser un llote de productos de la Xunta pola Defensa de la Llingua Asturiana y Xunta Moza; amás, el trabayu que resulte gallardonáu pue ser imaxe de campañes de sensibilización y/o reivindicación de dambes organizaciones.
(de Les Noticies, 15-02-2012)
Deixar ua Respuosta