IVÁN G. FERNÁNDEZ
En rellación a les declaraciones del martes 14 de febreru de la presidenta de l’Academia de la Llingua Asturiana (ALLA) sobre’l recorte de la subvención concedida pola Alministración, la Conseyería de Cultura acaba d’informar que’l llunes 14 de febreru’l director xeneral de Política Llingüística, Alfredo Álvarez, púnxose en contactu con Ana Cano pa informala del recorte del 40% na subvención, anque, nesa mesma conversación, Cultura asegura que tamién se-y manifestó qu’esi presupuestu nun yera definitivu y que «na midida de les posibilidaes que permitiera’l contestu actual de contención presupuestaria», la Conseyería tenía definíes dos prioridaes clares: «Mantener intactes les partíes destinaes a los Servicios de Normalización, porque d’elles dependen los puestos de trabayu de los sos responsables», y, en segundu llugar, «volver la subvención a l’ALLA a les cuantíes establecíes nel anteproyectu del 2012, esto ye: 167.900 euros nel capítulu de Tresferencies corrientes y 27.427 euros nel de Gastos en bienes corrientes y servicios.
Nesi sentíu, Cultura «llamenta qu’en nengún momentu s’aludiera a estos compromisos nes declaraciones a los medios de la presidenta de l’ALLA». Amás, l’Alministración afirma «tar convencida» de que la sociedá asturiana entiende la necesidá de que’l Gobiernu estableza prioridaes y de que va saber valorar el so esfuerciu pa siguir manteniendo polítiques d’apoyu a toles instituciones y a tolos sectores sociales y económicos comprometíos na defensa y recuperación del nuestru patrimoniu cultural y llingüísticu.
(de Les Noticies, 15-02-2012)
Deixar ua Respuosta