La organización xuvenil de reivindicación llingüística Xunta Moza aconceyó colos candidatos al Rectoráu de la Universidá d’Uviéu, Vicente Gotor y Paz de Andrés, a los qu’espunxo les necesitaes que, en materia de promoción del asturianu, habría de desarrollar la institución académica. En primer llugar, Xunta Moza mostró’l so esmolimientu pola falta de polítiques universitaries que planifiquen l’usu del asturianu, polo que se propunxo la creación d’un serviciu de normalización llingüística que lleve alantre un plan pa la normalización del asturianu na Universidá «con midíes, acciones y plazos concretos».
L’asociación en defensa del asturianu tamién insistió na «situación precaria» del idioma dientro de la Facultá de Filoloxía, al ser la única llingua moderna que nun cuenta con una asigantura nel primer cursu, común pa toles filoloxíes, y recordaron a los dos candidatos que tovía nun existe un grau propiu en Llingua Asturiana.
Otra de les demandes que Xunta Moza treslladó a los candidatos al Rectoráu foi la inclusión del examen d’asturianu na Prueba d’Accesu a la Universidá (PAU), pos ye la única asignatura optativa de Bachilleratu que nun val pa xubir nota na fase voluntaria de la PAU. Esti fechu fai que nun resulte motivador pal alumnáu de Bachilleratu a la hora d’escoyer una materia que nun-yos va valir pa entrar na Universidá.
Dende la Xunta tamién se quixo resaltar la necesidá de crear un serviciu de traducción propiu y non delegar na Conseyería de Cultura lo que, a xuiciu de la organización de reivindicación llingüística, «tien que xestionar la propia universidá». Anguaño, en virtú d’un protocolu firmáu nel 2009 entrambes les dos instituciones, ye l’Alministración autonómica la que s’encarga de traducir la documentación de la Universidá.
En resume, les entrevistes con Gotor y De Andrés valieron, según esplicaron fontes de Xunta Moza, pa que la organización pudiera esplicar cuáles son les midíes qu’habríen de tomase «pa consiguir acabar cola discriminación histórica que vien carenciendo l’estudiantáu, el profesoráu, los trabayadores y toles persones vinculaes, d’una o otra manera, cola Universidá d’Uviéu, y que tienen como llingua d’usu cotidianu l’asturianu». Tamién afalaron a los dos candidatos a recuperar l’espíritu en favor del idioma de la Universidá asturiana d’entesieglos, onde destacaron nomes como los de Félix d’Aramburu o Fermín Canella, «y separtase de les polítiques prexuicioses y acomplexaes en contra del asturianu de los últimos tiempos, personificaes en figures como Juan Vázquez».
(de Les Noticies, 15-03-2012)
Tierra alantre, la mesma fala 
Deixar ua Respuosta