La 33.ª Selmana de les Lletres Asturianes va abrise’l llunes 30 d’abril, a les 12.30 hores, na Casa Natal de Xovellanos, en Xixón, col actu de presentación del programa, qu’esti añu ta dedicáu a los escritores asturianos de la Ilustración Benito de l’Auxa y Antón Balvidares. Tal como s’esplica dende la Conseyería de Cultura, «nun contestu sociollingüísticu qu’anuncia yá la quiebra de la conciencia idiomática que vive l’Asturies de güei, estos poetes dan continuidá a una llarga tradición d’autores que, dende Antón de Marirreguera hasta los nuestros díes, nun se resisten al usu cultu –escritu– del asturianu».
Depués de les intervenciones institucionales, el profesor de la Universidá d’Uviéu Juan Carlos Villaverde Amieva va presentar el volume conmemorativu Al rodiu de la poesía ilustrada, editáu pola Conseyería de Cultura y Deporte y que se va regalar al comprar llibros o música n’asturianu’l vienres 4 de mayu en cualquiera de los establecimientos participantes. Nesti estudiu faise un repasu non solo a la obra de los escritores homenaxaos, sinón al papel que tuvo l’asturianu pa los autores de la Ilustración como «ferramienta pa entender la historia y el calter de la sociedá asturiana».
El mesmu día 30, pela tarde, l’actividá treslládase a la Capiella de los Dolores de Grau, onde, a les 20 hores y en collaboración cola Fundación Aula de les Metáfores, el grupu de teatru Nun Tris va interpretar l’adaptación teatral del poema Píramo y Tisbe, de Benito de l’Auxa. Nel mesmu escenariu, n’acabando la representación, el profesor de la Universidá d’Uviéu Xuan Carlos Busto y los escritores Sofía Castañón y Antón García van participar nun actu poéticu n’homenaxe a Benito de l’Auxa y Antón Balvidares.
Si’l llunes se presentaba’l llibru conmemorativu d’esta edición de la Selmana de les Lletres, el miércoles 2 de mayu va ser el turnu de l’antoloxía Poesíes, onde s’axunta la obra que se pudo localizar d’entrambos los dos autores homenaxaos. L’actu de presentación, al cargu de Xuan Carlos Busto, va facese a les 13 hores nel Paraninfu de la Universidá d’Uviéu. A les 19.30 hores, va descubrise una placa dedicada a Benito de l’Auxa na Biblioteca Carlos González Posada de Candás, d’onde yera nacíu esti escritor y presbíteru. Depués, el profesor Xuan Carlos Busto va dar la conferencia El poeta candasín Benito de l’Auxa: ente Marirreguera y Xovellanos.
El xueves 3 de mayu tolos actos van desenvolvese nel conceyu de Sariegu. A les 19 hores va descubrise una placa en La Casa Riba de Valvidares, onde nació Antón Balvidares, y a les 20 hores, na Casa la Cultura de Vega, Florencio Friera Suárez, del RIDEA, va pronunciar la conferencia Antón Balvidares Argüelles: un poeta sareganu de la Ilustración asturiana.
El vienres 4 de mayu, Día de les Lletres Asturianes, va celebrase l’actu escolar institucional na Escuela Pública Salvador Vega Berros, en Vega (Sariegu), onde les autoriedaes presentes van inaugurar la esposición La llingua na historia y entregar los premios del XVII Certame de Poesía y Dibuxu, el IX Certame de Cartelismu y el I Certame de Creación Audiovisual. Pela tarde, el protagonismu va ser pal gallego-asturianu, cola confrerencia Delas señas da Ilustración na Asturias occidental, que va pronunciar, a les 19.30 hores, na Casa la Cultura de Santalla d’Ozcos, el profesor de la Universidá d’Uviéu José Antonio Álvarez Castrillón. Amás, los llibros y discos n’asturianu y gallego-asturianu van tener un descuentu del 10% tol vienres 4 de mayu nes 53 llibreríes y tiendes participantes.
(de Les Noticies, 24-04-2012)
Tierra alantre, la mesma fala 
Deixar ua Respuosta