Nun Tris estrena una adaptación de «Píramo y Tisbe» dientro de la Selmana de les Lletres

La Conseyería de Cultura y la Fundación Aula de les Metáfores organicen ún de los primeros actos de la XXXIII Selmana de les Lletres Asturianes: la representación, pela primer vez, de l’adaptación teatral del poema Píramo y Tisbe, de Benito de l’Auxa, al cargu de Producciones Nun Tris. La función va ser el llunes 30 d’abril, a les 20 hores, na Capiella de los Dolores de Grau. Nel mesmu escenariu, el profesor Xuan Busto y los poetes Antón García y Sofía Castañón van participar nel homenaxe a Benito de l’Auxa y Antón de Balvidares, los dos autores a los que se dedica anguaño la Selmana de les Lletres.

Benito de l’Auxa nació en Candás nel añu 1743, según Constantino Suárez y González de Posada. Gradúase de bachiller n’Artes en 1761 y en Teoloxía en 1764 na Universidá d’Uviéu, d’onde pasa a la Universidá d’Alcalá. En volviendo a Candás, ordénase de presbíteru y faise cargu de la parroquia de San Pedro de Navarro (güei, nel conceyu d’Avilés, anque daquella pertenecía a Gozón). En 1777 gana, por oposición, una capellanía nel Hospital Xeneral de Madrid y en 1781 vuelve a Candás como párrocu, llabor al que va dedicar bien d’años. Ye autor, ente otres obres, del poema Píramo y Tisbe, una versión n’asturianu de la historia de los amantes Píramo y Tisbe, recoyida por Ovidio y otros autores clásicos, y oxetu de munches adaptaciones a lo llargo de la historia de la lliteratura, como la que fixo Shakespeare en Romeo y Xulieta.

Antón de Balvidares, l’otru escritor homenaxáu, nació en 1751, según Constantino Suárez, na casona solariega que la so familia, acomodada, tenía en San Román, nel conceyu de Sariegu. Dicen d’él que yera de calter gayoleru, aficionáu a les bromes y les chancies, y con un bon humor que conservó hasta la so muerte en Cecea (Nava), nel añu 1792. Ente les sos obres n’asturianu atópense L’entierru del Callóndrigu Regueru –bona muestra del so anticlericalismu–, Diálogu políticu –onde analiza delles noticies del mundu de la so dómina poniendo les reflexones na boca de dos aldeanos cultos– y El misteriu de la Trinidá y vida, pasión y muerte de Xesucristu.

(de Les Noticies, 23-04-2012)