El rector de la Universidá d’Uviéu, Vicente Gotor, clausuró esti miércoles 2 de mayu nel Paraninfu l’actu de presentación de la obra Poesíes, de Benito de l’Auxa y Antón Balvidares, editada pola Conseyería de Cultura y Deporte por cuenta de la 33 Selmana de les Lletres Asturianes. Y fíxolo naguando por que la Selmana fora un éxitu y «animando a la sociedá a lleer n’asturianu» porque esa «ye la meyor forma de garantizar el futuru de la llingua». Gotor, que faló n’asturianu, consideróse honráu de promover cualquier acción que tenga como oxetivu l’espardimientu de la cultura asturiana y, en concreto, de la so lliteratura. Pal rector, «la llingua y cultura d’Asturies son ún de los bienes más preciaos del so patrimoniu, son la so seña d’identidá y tendríen que ser un sitiu común d’alcuentru de tola sociedá, y non de disputa». Faló depués Gotor del apueste que ta faciendo la Universidá pol asturianu, que naz del convencimientu de qu’una Universidá enraigonada nel territoriu tien que se comprometer tamién nel ámbitu cultural. Vicente Gotor reconoció que son munchos los campos nos que la institución que dirixe pue incidir nel espardimientu, conocimientu y normalización del usu del asturianu, y destacó dos: nel terrén de la docencia, na formación del profesoráu; y nel terrén de la investigación, al traviés del Seminariu de Filoloxía Asturiana, que cuenta con «especialistes escelentes».
Pela so parte, el conseyeru de Cultura y Deporte, Emilio Marcos Vallaure, repasó na so intervención la rellación ente los escritores n’asturianu y la Universidá d’Uviéu yá dende’l sieglu XVIII, como yeren los casos de los autores antologaos na edición de Poesíes, Benito de l’Auxa y Antón Balvidares, lo qu’esplica los llogros poéticos algamaos a lo llargo de tantos años. Nomes como los d’Álvaro Díaz de Miranda, Xuan González Villar, Xusto Álvarez Amandi, Canella, Félix Aramburu, Teodoro Cuesta, Bernardo Acevedo, etc., mentáronse na intervención del conseyeru de Cultura pa destacar la vinculación patente ente los escritores n’asturianu y la institución académica dende bien atrás. En palabres de Vallaure –que remarcó la satisfacción pol papel activu que ta teniendo la Universidá d’Uviéu nesta 33 Selmana de les Lletres, lo qu’emponderó como un «actu de normalidá institucional»–, «lo universal precisa de lo local y lo local de lo universal». Amás, el conseyeru de Cultura y Deporte declaró «la prestosa satisfacción del Gobiernu d’Asturies pol espíritu de renovación científica que supón el Seminariu de Filoloxía Asturiana de la Universidá d’Uviéu, que ta abiertu a les llinies más novedoses de la investigación científica». Vallaure tamién agradeció al doctor Xuan Carlos Busto la edición tan rigorosa que se presentaba de la obra de Benito de l’Auxa y Antón Balvidares.
Xuan Carlos Busto, responsable de la edición, y autor de les notes y la introducción de la obra Poesíes, destacó les rellaciones personales d’amistá, amás de les lliteraries y d’interés pola llingua, ente Benito de l’Auxa, Gaspar Melchor de Xovellanos y Xuan González Villar (autor de La Xudit). Tamién faló de los puntos en común ente Antón Balvidares y Xosefa de Xovellanos, poetes que, frente al culturalismu, creyíen nun llirismu más popular y se caracterizaben por un humanismu vital y tamién críticu.
Nesti actu central de la Selmana de les Lletres Asturianes na Universidá d’Uviéu tamién tuvieron presentes la conseyera d’Educación y Universidaes, Ana Isabel Álvarez; el director xeneral de Política Llingüística, Alfredo Álvarez; miembros del Seminariu de Filoloxía de la propia Universidá; y los doctores Fernández Vega, que son descendientes d’Antón Balvidares.
(de Les Noticies, 02-05-2012)
Tierra alantre, la mesma fala 
Deixar ua Respuosta