La Conseyería d’Educación y Universidaes, al traviés de l’Asesoría d’Enseñances de Llingua Asturiana, entama pela primer vez, y por cuenta de la celebración de la 33 Selmana de les Lletres Asturianes, un conciertu didácticu pensáu especialmente pa los escolinos asturianos.
El recital, que nesta primer edición va tar dedicáu al director y compositor xixonés Enrique Truan, va celebrase’l miércoles 2 de mayu a les 18 hores, na Casa la Cultura Marta Portal de Nava. La iniciativa naz de la collaboración de la Conseyería, el Conservatoriu Superior de Música Eduardo Martínez Torner d’Uviéu y la escuela pública San Bartolomé de Nava, que reconocen la necesidá d’averar al alumnáu asturianu estilos musicales más desconocíos que complementen la formación artística recibida nos sos centros educativos.
L’asturianu va ser la llingua vehicular d’esti conciertu, que va tar conducíu por Kala y Tal, dos personaxes infantiles creaos pa la ocasión que, ente actuación y actuación, van interactuar con otru personaxe, Enrique Truan, y van esplicar a los escolares les característiques de cada interpretación.
Los alumnos de Pianu Complementariu del Conservatoriu Superior de Música d’Uviéu, dirixíos pola profesora Inés Estrada, van ser los encargaos d’interpretar les composiciones d’Enrique Truan, que van valir, amás, de complementu a les actividaes desenvueltes nes aules alredor de la figura del compositor asturianu.
Músicu con vocación poética, Enrique Truan (Xixón, 1905-1995) foi director de la Escuela de Música de Xixón de 1948 a 1970, miembru de númberu del Institutu d’Estudios Asturianos y Sociu d’Honor del Atenéu Xovellanos de Xixón. Ye autor de 248 obres de distintos xéneros: coros, cantates, obres pa pianu, violín y pianu, y guitarra.
(de Les Noticies, 02-05-2012)
Tierra alantre, la mesma fala 
Deixar ua Respuosta