Esti vienres 4 de mayu, Día de les Lletres Asturianes, 2.000 persones recorrieron les cais del centru d’Uviéu pa reclamar la oficialidá del asturianu. L’agua, qu’acompañó a los manifestantes tol recorríu, nun fixo callar les voces del grupu de panderetes qu’abría la marcha. Detrás d’elles, asociaciones, colectivos, partíos políticos, sindicatos y sociedá civil amosaron un añu más el so compromisu pa cola llingua. Al final de la manifestación, na Plaza Porlier d’Uviéu, Paula Cristóbal, en representación de la Xunta pola Defensa de la Llingua Asturiana (XDLA), lleó un manifiestu nel que dexó claro que la organización qu’entamó la manifestación reivindicativa va siguir combatiendo l’inmovilismu de tola xente contrario a la normalización y recuperación llingüística, «clas política o élite burocrática o económica», con un mensaxe bien claru: la reivindicación permanente. La representante de la organización fixo balance del últimu añu con unes palabres dures: «Esti Día de les Lletres llega depués d’un añu de tiempu perdíu, parálisis y inmovilismu. La nuestra clas política, que nun supo qué facer coles sos atribuciones y que nun quixo cumplir los sos deberes, sigue igual que siempre. Con unos nomes o con otros, sigue igual que siempre. Y les poques novedaes, faltaría más, son pa peor, p’abrir camín al discursu de la negación y l’odiu, pa negar la xusticia y la evidencia.»
Pa la Xunta pola Defensa de la Llingua «hai que trabayar pa que l’airón de la nuestra indignación arrastre’l so inmovilismu y la so axenda oculta de desaparición de la nuestra llingua. Nun merecemos una clas política que nun pue facer que sía llegal lo que ye de xusticia. La confirmación del Tribunal Supremu de que ye illegal poner un mínimu d’alumnos pa dar clas d’asturianu en Secundaria ye la muestra. Tuvo que venir la xusticia a dicir a los responsables d’Educación anteriores qu’eso nun ye llegal.»
Paula Cristóbal, en nome de la Xunta pola Defensa de la Llingua, pidió tamién que’l Gobiernu futuru cumpla cola llexislación llingüística vixente, use de la toponimia oficial, xeneralice la enseñanza del idioma y garantice la presencia d’esti nos medios de comunicación y l’usu normal nes Alministraciones. La organización cívica tamién pidió una reforma del Estatutu d’Autonomía que recueya la oficialidá y reconoció nel so manifiestu que «la crisis económica, amás d’afectar al bolsu y a los puestos de trabayu de la xente, ta repercutiendo gravemente na industria pequeña qu’usa l’asturianu y cree nello. Que ciarraren toles llibreríes especializaes o que desapaeciera l’únicu periodicu n’asturianu son una prueba clara. Amás, los recortes de les Alministraciones tán cebándose cola cultura. Nel casu del asturianu, con un presupuestu yá probetayu, la mengua de les subvenciones podría repercutir mui negativamente nel sector editorial y musical nel nuestru idioma, que nun pue sobrevivir ensin una política d’apoyu públicu. Amás, la desapaición de les partíes destinaes al sector priváu y a les entidaes locales afectaría negativamente na concepción social del idioma como una llingua válida pa tolos ámbitos».
A too esto hai que sumar, según la organización cívica de defensa de los derechos llingüísticos, «que’l Gobiernu asturianu sigue ensin cumplir cola Llei d’Usu y Promoción, que, anque curtia, ye la llexislación llingüística qu’hai. La recuperación de la toponimia, que diba a pasu lentu, nun vio nesta última llexislatura nengún espediente aprobáu y la propia Alministración nun usa les formes oficiales». Sobre los medios de comunicación públicos tamién hubo referencies nel discursu lleíu na Plaza Porlier d’Uviéu. Pa la XDLA, «el porcentaxe d’emisión n’asturianu na RTPA nun llega nin al 2%» y, respective a la estaya d’enseñanza, una de les pieces claves de tou procesu de normalización y recuperación d’un idioma, la Xunta recordó que «les circunstancies yá conocíes de precariedá de l’asignatura tán faciendo que l’asturianu siga marxinao en toles etapes imposibilitando que les xeneraciones nueves apriendan l’idioma y dexando la tresmisión xeneracional nuna situación dramática». La intervención ciarrosé, como yá ye vezu, pidiendo la oficialidá del asturianu.
ANEXU: Discursu final de la Manifestación pola Oficialidá.
(de Les Noticies, 04-05-2012)
Deixar un comentairo