La dirección d’Iniciativa pol Asturianu súmase a la retafila d’entidaes y instituciones que llamenten la muerte del ex-presidente asturianu Sergio Marqués, del que recuerden el so «compromisu cola llingua asturiana, que lu llevó a convertise nel únicu presidente qu’aprobó una Llei d’Usu del Asturianu nos más de trenta años d’autonomía», señala la organización nun comunicáu.
L’asociación recuerda, amás, que Marqués «defendió la necesidá de que l’asturianu fora idioma oficial n’Asturies», un determín que s’espeyó nos programes colos que concurrió a les elecciones. Iniciativa pol Asturianu trai a colación tamién la participación del fundador d’URAS en delles manifestaciones pola oficialidá y les sos intervenciones na prensa a favor de la equiparación llegal del asturianu.
Por too ello, señalen dende la organización, Marqués «ye un exemplu pa la clas política asturiana, onde tovía s’observen resistencies a normalizar la situación del asturianu» y trayen a la memoria les palabres del fináu: «Tendríemos que volver a sentir arguyu de la nuestra llingua».
(de Les Noticies, 08-05-2012)
Deixar ua Respuosta