Preséntase «Aeropuertu», de Xurde Fernández y Marián García, na FNAC

Aeropuertu, la segunda novela escrita mano a mano por Xurde Fernández y Marián García, preséntase esti vienres 11 de mayu na FNAC de Parque Principado, a les 19.30 hores. Na presentación van tar, amás de los autores, David Fernández y Silvia Cosío, responsable de Suburbia Ediciones. Depués d’El color del escaezu, esta novela ye la so cuarta collaboración, porque tamién escribieron xuntos los llibros L’árbol de la verdá y Febreru 29 pal públicu infantil y xuvenil. Aeropuertu ye una obra con histories cruciaes alredor de dos viaxeros a los que tracamundien les maletes accidentalmente nun aeropuertu. A partir d’esti fechu aparentemente ensin importancia, los autores desarrollen dos histories en paralelo hasta llegar a un final sorprendente y conxuntu.

Xurde Fernández (Candás, 1975) ye filólogu y profesor de llingua asturiana, amás d’escritor y estudiosu de la cultura asturiana. Autor de Volver, La espera, Ucrania y otros nomes de muyer y Intentu d’escritura, tien llograo premios lliterarios como’l Llorienzu Novo Mier nel añu 2008 con Díes d’iviernu. Marián García (Xixón, 1975) ye filóloga y Esperta en Llingua Asturiana pola Universidá d’Uviéu. Anguaño ye profesora de Llingua Asturiana en Candás. Los dos autores tamién escribieron xuntos el manual A la gueta del material espardío. Llingua asturiana y lliteratura.

(de Les Noticies, 10-05-2012)