«Paga la pena, agora que yá tenemos dominao Internet, volver a cuidar lo que se publica»

HENRIQUE G. FACURIELLA

Sofía Castañón (Xixón, 1983) ye ún de los tres nomes –xunto a los de Rubén d’Areñes y Héctor Pérez Iglesias– qu’inaugura la colección de poesía en formatu electrónicu E-sguil, editada pola editorial Hesperya. En Destruimientu del xardín, Castañón recupera ún de los topoi clásicos de la poesía asturiana, la casa, a la qu’asitia non solo nel ámbitu de lo rural, sinón sobre manera de lo urbano, arrodiada d’un xardín que se creía terrén conocíu y que se revela más efímeru de lo que se contaba.

¿Qué significa pa usté la casa?
La casa ye la llingua y ye tamién lo que se vive dientro de la casa. Son los esmolimientos, non tanto como neures, sinón como problemes qu’hai dientro de la casa. Ye’l cuerpu físicu pero tamién el cuerpu social, la manera que tenemos de tar en sociedá, que ye complexa enforma.

¿A qué realidá fai referencia’l xardín del que fala’l títulu?
Los primeros llectores del llibru, xente de confianza a quien consulto, entrugáronme si facía referencia a la frase de Malcom Lowry «¿Présta-y esti xardín, que ye suyu? ¡Nun dexe que los fíos lu destruyan!». Anque me gusta’l detalle, nun yera esta cita lo que tenía presente cuando topé’l títulu, que foi una de les primeres coses que topé nel procesu de composición d’esti poemariu. Tien que ver más bien cola idea de xardín como un conceptu que teníamos asumío como verdá y como casi tanxible porque un xardín ye un sitiu pel que pues pasiar pero que, quiciabes, nun yera nin tan tanxible nin tan real. Tuvi mui presente’l desastre de Fukushima como una metáfora de que tolo conocío taba destruyéndose. Tolo conocío y alimentao, tanto nun procesu personal –que tien que ver cola madurez– como nun procesu social –que tien que ver colos tiempos que nos toquen–, tolo conocío, que daba muncha tranquilidá, ta esbaratándose. Esta ye, de dalguna manera, la idea asociada a la imaxe del xardín.

La casa y el xardín formen una unidá física, polo menos no que se refier a los xardinos privaos. ¿De qué manera se rellacionen estos dos espacios nel llibru?
Dientro de que tamos falando siempre n’abstracto, la casa podría ser lo más concreto, lo más físico o lo más abarcable; mentes que’l xardín seríen los conceptos, les verdaes o lo conocío, que ye muncho más amplio, como les seguridaes. La casa, entós, representaría verdaes más precises, anque la idea de precisión danos tamién muncha tranquilidá. La distinción respuende al fechu de saber que la casa va siguir tando y que’l xardín nun ye tal.

Nel llibru espéyase la gravedá de munches situaciones que vive la sociedá actual pero, dacuando, apruz un impulsu de garrar distancia respecto a elles. ¿Cuáles son les razones d’esti apartamientu?
Ye bono mirar d’apartase pa poder comunicate meyor con tol mundu o, polo menos, con quien quiera comunicase contigo. Considero qu’apartame ye la manera de llograr non tanto una universalidá pero sí un diálogu. Si queda no más vivencial o intimista –que, nesti casu, podría funcionar como lo mesmo–, el diálogu acaba siendo más bien un monólogu y esmolecíame muncho pensar que la única manera que tenemos d’atopar la solución que sía pa lo que ta pasando y que realmente ye preocupante ye l’intercambiu, pero l’intercambiu con arrogancia y honestidá. Por eso, si acabamos falando dende una perspectiva mui apegada a la d’ún mesmu va ser mui complicao que podamos aportar nada. Eso nun significa posicionase nun puntu de vista que nun ye’l tuyu sinón que, ensin perder la conexón cola manera propia de ver les coses, quitar la primer visceralidá, da-y temple pa consiguir que la verdá que quies compartir funcione meyor.

Esta reflexón llévame a unos versos del poemariu: «Irónica de min, salvéme / d’andar esbillando / ente la llingua de los cures / y la de los revolucionarios».
Parecíame mui complicao andar estremando cuándo ye la llingua d’unos y la d’otros, amás de ser un guiñu a la mio formación –tanto académica como emocional– dada pol entornu y porque fui a un colexu concertáu. Col tiempu descubres qu’hai términos que s’usen mal en pro, quiciás, de dellos intereses y depués, na adolescencia, una tien que dir esbillando qué taben diciendo unos y otros, porque neso de ser criminales col llinguaxe tienen toos parte. El llabor d’una ye andar entendiendo cuála ye la manera de dicir les coses lo más directa y honesta posible, consiguir tamién na llingua esa honestidá.

El llibru parez movese ente una poesía de llinia clara, apegada a la realidá y de significaos reconocibles, y una tendencia más metafísica, más simbólica y escura. ¿Fixo un usu consciente de caúna d’estes formes según lo que quería dicir?
La razón ye que, depués de tener muncho escrito, lleío y pensao –sobre manera nel tiempu que tuvi na Residencia d’Estudiantes, en Madrid–, atopé munches reflexones alredor del poema anécdota y el poema metafísicu –por llamalo de dalguna forma que, quiciás, nun sía la más correcta–. Depués de tantísima reflexón acabé llegando a la conclusión de que lo que más m’apetecía yera facer lo que me diera la gana y por facer esto acaba teniendo’l poemariu esti tonu híbridu. Ye la manera que tenía –unes veces más concreta y otres más abstracta– d’espresar les coses que, nel tiempu d’escribir el llibru –a finales del 2011– m’esmolíen y llevaben tiempu esmoliéndome.

La poesía ye ún de los xéneros lliterarios onde la presentación formal y visual del testu tien más importancia. ¿En qué midida influyó la publicación como llibru electrónicu nel procesu d’escritura?
Anque tovía güei escribo pensando que se va lleer en papel, nel procesu d’escritura nun tuvi presente que se diba publicar nun formatu o n’otru. El qu’al final se publicara nun soporte dixital ye frutu de coses que nun tienen que ver col procesu de composición del llibru nin cola témática, namás coles circunstancies. Creo que ye un exerciciu de coherencia, si creo que, realmente, el soporte nun ye tan importante, sinón que lo fundamental ye llegar a la xente. Agora mesmo, el soporte dixital ye más viable tanto pa quien quiera lleer como pa quien quiera publicar. Pa les editoriales ye menos costoso y funciona bien. Otra manera, tamién foi una decisión de nun dir na llinia continuista de publicar coles tres o cuatro editoriales qu’editen n’asturianu y a les que siempre se va. Amás, depués de falalo colos otros dos compañeros de colección, Ruben d’Areñes y Héctor Pérez Iglesias, los tres coincidimos en que nun queríemos siguir per esa llinia, sinón probar otres coses.

El so trabayu creativu esprésase principalmente na lliteratura y nel audiovisual, pero tamién tien una actividá mui grande nes redes sociales, onde munches veces cuenta’l procesu de los proyectos nos que trabaya. ¿Cómo afecta esta esposición al resultáu final?
Nos últimos tiempos, cada vez voi falando menos del procesu. De lo que más falo ye del trabayu audiovisual, mentes que del trabayu de composición lliteraria nun suelo, en xeneral, tratar muncho más que de lo que va saliendo. Y cada vez menos, porque cada día veo que tamos más sobrecargaos d’información y otres coses, y nun sé hasta qué puntu ye interesante añadir dalgo más.

¿Refierse a información personal, a cuestiones qu’afecten a la vida privada?
Non, principalmente falaba de los procesos creativos. De lo otro cuasi nun voi falar, anque tamos cargaos sobre manera de too eso. Noto qu’hai munchu ruíu na rede, muncha información que cuando se xube yá ta vieyo y paga la pena, agora que yá tenemos un poco dominada la materia d’Internet, volver a cuidar lo que se publica, lo que se comparte, mimalo y pensar hasta qué puntu ye importante compartir eso. Ye como cuando de críos marcábemos un númberu al azar nel teléfonu a ver quién descolgaba; daquella podía facete gracia pero agora, que tamos perfamiliarizaos cola telefonía, nun se nos ocurre facer eso porque nos parez una fatada. Creo que’l momentu fatada d’Internet –el probar a ver hasta ónde nos lleva, hasta ónde puedo facer, que ye en sí mesmo un exerciciu– yá ta superáu, tamos meyor formaos y somos más maduros como usuarios. Yá sabemos qu’Internet ye un sistema de comunicación que podemos usar con una finalidá más seria, na midida que lo qu’importe, al final, sía’l conteníu de lo que dices y non el mediu al traviés del que lo faes.

Nún de los poemes fala de les poques posesiones que tien y conclúi col enfotu en que, nel momentu qu’haya que facer ñeru, poco más faiga falta. ¿Nota esa tensión ente la tendencia a dir llixera d’equipaxe y lo que manda l’entornu?
Quiero pensar que cada vez vamos poder permitinos dir más llixeros y, al mesmu tiempu, bien forradinos de lo que ye importante. Pensando no vivencial, agora mesmo tenemos que facer un ñeru realmente porque vamos tener un críu y hai qu’esplicar a tol mundu que nun queremos toa esa cantidá de mercáu que se mueve alredor del fechu de qu’haya un ser pequeñu en casa. Intentamos reutilizar les coses y nun comprar y comprar. Sobre too nun ye pola cosa de comprar, que va rellacionada col gastu, sinón sobre manera pola cosa de tener. Lo que ye tener, fai falta mui poco, si tienes lo qu’importa de verdá. Suena mui tópico pero, a la hora de la verdá, ye de les poques coses que t’asegura un aquel de felicidá y estabilidá, el poder dominar l’entornu y non que l’entornu, con tou esi consumu voraz, la controle a una.

¿Tien esto dalgo que ver cola esperiencia personal de viaxar davezu y vivir, dacuando, ente delles ciudaes?
Sí, porque vas faciendo un fatu cada vez más pequeñu y, da igual ónde vivas, hai coses que siempre vas necesitar y que son cada vez menos de les que pensabes. Pues vivir ensin la mayor parte de los llibros ensin los que pensabes que nun podíes vivir, y pues vivir con mui poca ropa, con mui poques telecomunicaciones y con un equipaxe físicu –y quiciabes tamién emocional– bien poco pesáu. Supongo que, de tanto moveme, al final fui atopando la manera de que’l movimientu funcione.

(de Les Noticies, 05-06-2012)