Xabier Frías Conde, escritor y profesor de gallegu y portugués na Universidá Nacional d’Educación a Distancia (UNED), acaba de publicar Compendio de gramática asturiana, un manual dirixíu a castellanofalantes que quieran conocer los fundamentos gramaticales de la llingua asturiana.
El llibru, publicáu pola Editorial Académica Española, respuende a la necesidá que tienen munches persones que s’averen al asturianu de contar con una gramática práctica y cenciella. Por esti motivu, el manual redactáu por Frías Conde intenta ofrecer claridá y amenidá nel estudiu de la llingua asturiana estándar pero coles esplicaciones en castellanu, dalgo que la diferencia de la mayoría de les gramátiques publicaes hasta la fecha, que tán, precisamente, n’asturianu.
A xuiciu del autor, la redacción en castellanu va permitir ampliar el númberu d’estudiantes que tienen accesu al idioma asturianu, amás de cubrir les necesidaes didáctiques de munches personas que, señala, van poder estudiar en clas o por cuenta propia los rudimientos de la gramática de la llingua asturiana.
(de Les Noticies, 07-06-2012)
Deixar ua Respuosta