Esti miércoles 20 de xunu, a les 19.30 hores, nel Ateneo Jovellanos de Xixón (C/ Francisco Tomás y Valiente, 1), Roberto González-Quevedo va pronunciar la conferencia titulada La cultura asturiana. Introducción a l’antropoloxía d’Asturies, que va valir de presentación al llibru del mesmu títulu publicáu por CH Editorial. La charla va presentala Xosé Nel Riesgo, director de la Fundación Municipal de Cultura de Xixón.
La obra que presenta ye una introducción a la cultura asturiana y nella estúdiense dende les bases económiques onde s’afiten los vezos sociales hasta les creyencies máxiques qu’inda viven ente la xente d’Asturies. Faise un averamientu a temes como’l mesmu conceptu de cultura asturiana, les actividaes llabradores, les práctiques rituales, los ritos de pasu, les fiestes, el puxu identitariu de Cuadonga, la tradición oral y los vezos que tienen que ver cola bruxería. La cultura asturiana ye una obra fecha baxo la perspectiva del cambiu social y, polo tanto, ye un estudiu críticu de cómo la cultura asturiana, una realidá viva, foi camudando, pa iguar asina, al principiar el sieglu XXI, una realidá cultural nueva.
Roberto González-Quevedo González ye doctor n’Antropoloxía pola Universidá Autónoma de Madrid y doctor en Filoloxía Hispánica pola Universidá d’Uviéu. Anguaño ye caderalgu de Bachilleratu y profesor de Llingua Asturiana na Universidá d’Uviéu, amás de miembru de l’Academia de la Llingua Asturiana.
(de Les Noticies, 20-06-2012)
Tierra alantre, la mesma fala 
Deixar ua Respuosta