La Xunta pola Defensa de la Llingua Asturiana (XDLA) emitió un comunicáu nel que tacha d’«inconcretes» les referencies que fixo la conseyera d’Educación, Cultura y Deporte, Ana González, na so comparecencia énte la Xunta Xeneral, a les midíes de política llingüística que va llevar alantre’l departamentu que dirixe nesta llexislatura.
La referencia al usu institucional del asturianu n’Alministración autonómica y el rediseñu de la Selmana de les Lletres, los dos anuncios principales que fixo la conseyera sobre polítiques de promoción del asturianu na Comisión d’Educación, Cultura y Deporte del martes 17 de xunetu, son, a xuiciu de la XDLA «de lo más secundario y con un grau d’ellaboración, ciertamente, pa llamentar».
La organización en defensa de los derechos llingüísticos esperaba que González contara na sé parllamentaria «lo que va facer realmente» y non un «corta y apega» del programa electoral del PSOE. Los portavoces de la XDLA señalen que «tamién ye d’esperar» que les polítiques que desenvuelva la Conseyería d’Educación y Cultura cumplan, como mínimo, la llexislación vixente na materia –en referencia a la Llei d’Usu y Promoción del Asturianu– «y nun supongan, por elles mesmes, una rebaxa constante de los derechos que la ciudadanía yá tien reconocíos».
Sicasí, pa la XDLA, lo «más grave» de la intervención de la conseyera foi l’ausencia de referencies a la situación de la enseñanza del asturianu nel sistema educativu. Nesti sen, el comunicáu de la organización califica la comparecencia de «surrealista» por nun dicir nada de la creación de la especialidá de Llingua Asturiana pal profesoráu nin del cumplimientu de les sentencies qu’eliminen el númberu mínimu d’estudiantes pa impartir asturianu y qu’obliguen a l’Alministración a recordar a los centros educativos de la comunindá «que tienen qu’ufiertar l’asignatura a toles persones que lo soliciten».
Por too ello, la organización pide a la Conseyería de la que ye responsable Ana González y, concretamente, a la Dirección Xeneral de Política Llíngüistica que preparen «actuaciones sistemátiques de normalización» y que «nun reduzan el so llabor a simples declaraciones d’intenciones y al continuismu burocráticu sordu».
(de Les Noticies, 23-07-2012)
Deixar ua Respuosta