Muerre Puru, percusionista del grupu folk Corquiéu

David Mateos Rosete, conocíu como Puru, percusionista del grupu folk Corquiéu morrió esti xueves como consecuencia de les quemadures mui graves que sufrió al esplota-y el motor del coche que conducía cerca del llugar de Torre, nel conceyu de Ribeseya. Depués del fatal accidente, Puru consiguió buscar socorru nos vecinos de la zona. Éstos pidieron asistencia sanitaria al 112 Asturies. Bomberos y un grupu de rescate con un helicópteru medicalizáu foron a auxilialu y evacuaron al accidentáu hasta l’Hospital de Les Arriondes primero ya hasta l’HUCA, n’Uviéu, depués. Dende esti últimu centru foi teslladáu al Hospital Universitariu de Getafe especializáu en quemadures graves, onde nun fueron quien a salva-y la vida.

Puru, yera fundador del grupu Corquiéu, una de les formaciones más sólides y con más prestixu de la escena musical asturiana. Tamién foi componente de la Banda Gaites Ribeseya y collaboró con dellos grupos como Tuenda, N’Arba, Xéliba, Mala Reputación, La Banda Gaites Llacín o Nuberu. Nes redes sociales compañeros de profesión, amigos y siguidores espresen en cientos de mensaxes el dolor pola so perda y tresmiten cariñu y ánimu a familiares, amigos y compañeros de Corquiéu. Ribeseya pierde con esta desgracia un vecín queríu y comprometíu col so pueblu, un hosteleru activu (rexentaba’l Chigre’l Corquiéu que facía conciertos en directu), un deportista y un gran músicu. La música asturiana, una gran familia, llora la so ausencia.

Pa Xuan Nel Expósito, acurdionista de Felpeyu, «Puru yera ún de los meyores percusionistes d’Asturies, –especialmente brillante col bodhram, aunque tocaba’l caxón, la batería, el tambor y el bombu– y ún de los motores de Corquiéu. No personal yera tímidu pero mui divertíu cuando garraba confianza». Expósito tamién quier destacar que «Yera una persona siempre dispuesta a ayudar y un gran compañeru. Cuando en Felpeyu sufrimos l’accidente nel que perdimos a Ígor y a Carlos, Puru y tolos demás compañeros de Corquiéu volcáronse con nosotros, apoyándonos y hasta sustituyéndonos desinteresadamente en conciertos que teníemos programaos». Pa Víctor Carbajal, director de la Banda Gaites Llacín de Llanes, «Puru, como músicu yera mui completu y amás de la so grandeza como instrumentista yera humilde y cercanu al tratu lo que da idea de la so grandeza tamién como persona». «Dende la Banda Gaites Llacín tamos peragradecíos d’él pola so collaboración na grabación del nuestru discu Xideces y pola so participación nel espectáculu en directu que se grabó en DVD. Ye una gran perda pa toos nós», añade Víctor Carbajal.

(de Les Noticies, 24-08-2012)