Carlos Pulgar: «La mengua nes subvenciones va acarriar despidos na industria cultural n’asturianu»

HENRIQUE G. FACURIELLA

El portavoz de la Xunta pola Defensa de la Llingua Asturiana, Carlos Pulgar, avisa de que la reducción de la cuantía nes subvenciones a la normalización social del asturianu y el gallego-asturianu –que se publicó nel BOPA del 13 de setiembre y que vien a sumase al recorte que yá se produciera na convocatoria d’anguaño en comparanza cola del 2011– va acarriar destrucción d’empléu na industria cultural n’asturianu.

Pulgar considera «llamentable y contradictorio» que’l Gobiernu autonómicu anuncie planes pa crear empléu por un montante de 10 millones d’euros y, pero otru llau, «apruebe recortes nun sector, como’l de la industria cultural n’asturianu, que yá ta mui mermáu y pal qu’esta mengua va suponer la reducción de puestos de trabayu, sía por despidos o porque ciarren empreses».

Por esti motivu, la XDLA reclama a la Dirección Xeneral de Política Llingüística, qu’«esixa fondos que compensen esta mengua pa poder atender a les necesidaes de les industries culturales n’asturianu». Amás, el portavoz de la organización en defensa de los derechos llingüísticos recuerda que tanto l’Estatutu d’Autonomía como la Llei d’Usu y Promoción manden a l’Alministración autonómica protexer l’asturianu y que, en tiempos de recortes presupuestarios, les partíes destinaes a la protección y normalización social del idioma habríen de ser «prioritaries».

Nesti sen, Pulgar fai referencia a los datos del déficit autonómicu que publicó’l xueves 13 de xunetu’l Ministeriu de Facienda y qu’asitien el saldu negativu asturianu nun 0,53% nel primer semestre del añu, lloñe tovía del 1,5% qu’hai de tope pal 2012. «La midida ye tovía menos llóxica cuando los datos parecen mostrar que la execución presupuestaria ta equilibrada», señala.

Según esplica’l so portavoz, nel senu de la XDLA acoyóse l’anunciu d’estos recortes nuevos con «sorpresa y descontentu» porque, anque na entrevista que Les Noticies publicó n’agostu la directora xeneral de Política Llingüística, Ana Fueyo, anunciara que diba producise una mengua nes subvenciones, nel conceyu que dellos representantes de la organización caltuvieron el 10 de setiembre con Fueyo y cola conseyera d’Educación y Cultura, «nenguna d’elles faló de que diben contar con menos dineru pa llevar alantre les actividaes que teníen previstes d’equí p’alantre», informa Pulgar.

(de Les Noticies, 14-09-2012)