La XDLA va proponer la modificación de los estatutos del Conseyu de la Llingua de Xixón

Esti martes 25 de setiembre va celebrase la primer xunta del Conseyu Asesor de la Llingua de Xixón, un órganu sectorial y consultivu que quier afalar la participación de la ciudadanía sobre l’usu efectivu del asturianu nel conceyu. A la primer xunta, que va celebrase esti 25 de setiembre nel Antiguu Insitutu baxo la presidencia del conceyal Carlos Rubiera, foron invitaes les asociaciones de defensa del idioma, como Iniciativa pol Asturianu o la Xunta pola Defensa de la Llingua Asturiana (XDLA). Esta última yá confirmó que va participar nel conceyu pa proponer una modificación estatutaria sobre la so composición. La XDLA entiende que los estatutos del Conseyu aprobaos nel añu 2008 son «claramente restrictivos en participación y representividá de los sectores implicaos na recuperación y normalización de la llingua asturiana».

Y ye qu’esti órganu ta formáu por representantes de los grupos políticos con representación nel Conceyu, por un representante de la Conseyería de Cultura, ún del Conseyu de la Mocedá de Xixón, ún de l’Academia de la Llingua, ún de les asociaciones de vecinos, ún de los vecinos de la zona rural, ún de CC.OO, ún d’UXT, ún d’USO, ún de Suatea, ún de la Unión de Comerciantes, dos de l’asociación d’hosteleros y, p’acabar, dos persones de «prestixu reconocíu» y dedicación a los llabores rellacionaos coles funciones del Conseyu, nomaes pola Alcaldía.

Ún d’eses persones de «prestixu reconocíu» va ser escoyíu d’una terna propuesta por asociaciones de defensa del asturianu, qu’amás van poder participar nes xuntes si son llamaos pol Conseyu, anque van asistir con voz pero ensin derechu a votu. D’ehí vienen les crítiques de la XDLA, qu’entiende que pa que’l Conseyu Asesor de la Llingua sía una ferramienta útil, «tien que cuntar na so composición cola participación protagonista y non residual de les entidaes que tienen la defensa del asturianu como base de la so actividá». Enantes de 2008, el Conseyu Asesor taba formáu por Suatea, CCOO, UXT, XDLA, Academia de la Llingua, Foru Arte Ciudá, Conseyu de la mocedá de Xixón, Tertulia cultural El Garrapiellu y los comerciantes de la ciudá.

Otra manera, dende Iniciativa pol Asturianu informaron al traviés d’una nota de prensa que tamién foran convidaos a participar. La organización va poner sobre la mesa delles cuestiones, como la falta d’usu de la toponimia nos autobuses del conceyu, «un pasu atrás claru na normalización de los usos toponímicos, asina como nel festival Gijón de sidra, nel qu’esti añu tamién observamos pasos atrás nel usu de la toponimia oficial». Amás, van facer una valoración del primer añu y mediu de mandatu del gobiernu nuevu del Conceyu de Xixón no que se refier a la política llingüística.

Según los sos estatutos, el Conseyu Asesor de la Llingua va desarrollar funciones d’informe y propuesta pa facer efectivu l’exerciciu de los derechos llingüísticos de la ciudadanía de Xixón. Amás, va poder afalar l’alcuerdu de planes específicos col Gobiernu d’Asturies pa facer efectivu l’usu del asturianu nel Conceyu. El Conseyu pue tamién facer propuestes pa esparder los derechos llingüísticos y campañes d’apoyu a los mesmos, amás de proponer actuaciones que promueven la cultura asturiana. Tamién pue afitar criterios y informar de les solicitúes de subvención relatives a la promoción del asturianu o sobre la distribución de les partíes del Conceyu dedicaes pa eso, amás de proponer la organización d’alcuentros, cursos, xornaes, conferencies y esposiciones sobre la promoción del asturianu. Dende’l Conseyu pue proponese amás la edición de llibros, revistes o documentos y la creación d’un fondu documental sobre los asuntos de competencia del Conseyu Asesor de la Llingua que van integrar l’Archivu del Conceyu.

(de Les Noticies, 25-09-2012)