El xuráu de l’Asociación d’Escritores d’Asturies (AEA), formáu polos miembros de la xunta directiva Marcelo Matos, Carmelo Fernández, Mariano Arias, David Fueyo, Ernesto Colsa y Ángel García Prieto, exerciendo Armando Murias como secretariu, decidió conceder por mayoría’l Premiu de les Lletres 2012 a la escritora asturiana Carmen Gómez Ojea, autora que tien publicáu dellos llibros n’asturianu. Amás, tamién recibieron premios los escritores Fulgencio Argüelles y Pepe Monteserín, que publicaron ún llibru caún nel nuestru idioma.
Ye de reseñar que nesta edición del 2012, l’AEA decidió dexar fuera a la lliteratura n’asturianu alegando producción escasa y motivos presupuestarios. Por mor d’esta decisión, más de 250 firmes avalaron un manifiestu nel que se pidió a l’Asociación que rectificara la so decisión. Escritores, editores, xente del mundu de la cultura y ciudadanos non vinculaos a disciplines creatives firmaron un manifiestu onde calificaron la decisión de l’Asociación d’Escritores como «un ataque a la llingua asturiana y una falta de respetu a los escritores nesti idioma». Otra manera, el poeta avilesín Carlos Suari tomó’l determín de volver el premiu de la Crítica que recibiera nel añu 2009 pol so poemariu Orbayu d’alfileres.
Nesta edición d’anguaño, acutada pa la producción en castellanu, el xuráu reconoció col Premiu de les Lletres 2012 a Carmen Gómez Ojea pola «amplia carrera como escritora nel mundu de les lletres». Asina, l’acta afirma qu’esta autora reivindica na so obra «una estética y una ética comprometíes colo más esencial y fráxil del ser humanu, siempres con una calidá lliteraria que dellos galardones, tanto asturianos como nacionales, supieron reconocer». Sicasí, y a pesar del vetu al asturianu, nesa trayectoria que l’AEA reconoz, hai títulos infantiles nel nuestru idioma, como Hermanina, Sol, nena y pitín, Cancios pa neñes/os desconsoñas/os; la novela xuvenil El nome de Roselina; o Na quinta estación, que ye una de les tres noveles p’adultos publicaes n’asturianu por una muyer nel Surdimientu. Amás, esta autora participó na campaña Doi la cara pola oficialidá.
No que se refier a los Premios de la Crítica, y na modalidá de Columnismu lliterariu, el mesmu xuráu decidió conceder por mayoría’l gallardón d’anguaño al escritor Fulgencio Argüelles, al valorar que «nos sos artículos analiza la realidá dende una perspectiva crítica, orixinal y de un gran valor lliterariu». L’escritor tien publicaos tamién artículos n’asturianu na edición impresa de Les Noticies y ye autor de Seronda, un llibru de rellatos n’asturianu publicáu pola Academia de la Llingua Asturiana.
Otra manera, el Premiu de la Crítica na modalidá de Lliteratura infantil y xuvenil foi pa Casualidad, de Pepe Monteserín. Precisamente, esti autor tien publicáu Ensin párpagos, un llibru ilustráu pa rapazos qu’editó l’Academia de la Llingua. Per otru llau, Jorge Ordaz pola novela El fuego y las cenizas y Rodrigo Olay pol poemariu Cerrar los ojos para verte foron los otros gallardonaos.
(de Les Noticies, 09-11-2012)
Tierra alantre, la mesma fala 
Deixar ua Respuosta