DAMIÁN BARREIRO
El Teatru de la Llaboral de Xixón va acoyer el sábadu 1 d’avientu, a partir de les 21.30 hores, la celebración del festival Liet International 2012, nel que participen once grupos que canten nuna llingua minoritaria europea. Con diez años de trayectoria y depués de cinco de participación d’Asturies, ye la primer vez qu’esti festival se celebra na Península Ibérica. Por eso, falamos con Ana Fueyo, directora xeneral de Política Llingüística, p’analizar lo que va suponer esti eventu pal nuestru país y cómo ye’l trabayu que se ta faciendo dende’l Gobiernu d’Asturies pa entamar esta edición del que ye conocíu como l’Eurovisión de les lingües minoritaries.
¿Qué supón p’Asturies y pa la so llingua acoyer la celebración del Liet International?
Pa la llingua asturiana nun dexa de ser una reconocencia grande dientro de la Fundación Liet, que ye una entidá qu’axunta idiomes minoritarios de toa Europa. Otra manera, qu’Asturies, col sofitu del Gobiernu autonómicu, sía la comunidá qu’entama’l festival -amás de ser la primera de la Península Ibérica-, supón da-y una relevancia al Festival Liet como eventu cultural y musical, pero tamién como actu que tien que ver col fomentu y la normalización de la nuestra llingua. Amás, p’Asturies tamién supón una plataforma turística bien importante.
Fala de la importancia turística y internacional del Liet, ¿na organización del festival, amás d’esta Dirección Xeneral, hai otros departamentos implicaos, como pue ser Turismu?
El Conseyu de Gobiernu conoz tolo que se ta faciendo al traviés de la conseyera d’Educación y Cultura. El mesmu presidente d’Asturies ta al tantu del programa d’esti eventu. Sicasí, tol trabayu grande ta desarrollándose dende la Dirección Xeneral de Política Lligüística y baxo la supervisión de la Conseyería d’Educación, Cultura y Deportes.
Nes últimes selmanes una parte grande de tol trabayu centraríase na organización del Liet…
Sí, anque hai un trabayu habitual de la Dirección Xeneral, de la que tamién depende la Oficina de Política Llingüística, que tien que siguir y nun puen parar pol festival. Hai díes publicóse nel BOPA la resolución de subvenciones a entidaes locales, dalgo que tuvo que tramitase y pa lo qu’hubo un xuráu que necesitó d’aconceyar. Amás, nestes selmanes tamos faciendo visites a tolos servicios de normalización municipales. Anque nun hai muncha xente trabayando dientro del organigrama d’esta Dirección Xeneral, son persones mui trabayadores y mui implicaes nel llabor. Tengo la fortura de contar con un equipu de xente a los que’l trabayu nun-y pesa: mesmamente, munches veces trabayen pencima de les sos posibilidaes. En xeneral, toles persones que trabayen alrodiu de la llingua son como una especie d’ONX que van acullá de les espectatives del so puestu de trabayu.
Pela organización d’esti Liet Asturies 2012 pasaron tres alministraciones autonómiques y tres directores xenerales de Política Llingüística, ¿supunxo esto dalgún problema?
Había un alcuerdu nel qu’Asturies se comprometió a facer el Liet. En febreru d’esti añu hubo una xunta de la Fundación, pero de dalguna manera yera p’afitar el compromisu de que díbemos facer el festival y poner los medios afayadizos. A partir d’ehí, garremos el relevu y tuviemos qu’empezar cola organización.
Nun de los actos que fai la Fundación Liet a lo llargo del añu, usté ufrió una conferencia sobre’l papel de la música na normalización del idioma, ¿cómo ve esi papel?
La música ye ún de los pegollos que tien la llingua pa poder normalizase ente la sociedá: ye una manera d’atopar adictos, por dicilo de dalguna forma, ente la xente más mozo. Muncha mocedá averóse a la cuestión llingüística al traviés de dellos grupos que supieron conxugar un determináu formatu músical y la llingua asturiana. Esi binomiu fixo qu’a la mocedá llegue-y muncho meyor l’asturianu al traviés de la música qu’al traviés d’un formatu d’aprendizaxe. La música ye un pegollu fundamental y, por eso, tamos nel camín de potenciar tolos formatos y tolos grupos musicales que trabayen n’asturianu, anque nestos tiempos les coses tán más difíciles.
Nel festival tamién va actuar fuera de concursu Dixebra, un grupu qu’inauguró la participación d’Asturies nel Liet International…
Ye verdá, foi nel añu 2008 en Lulea. Daquella foron escoyíos pa participar y quedaron clasificaos nel segundu puestu, dalgo que muestra la calidá de la música que fai esti grupu. A partir de la so participación surdió la collaboración d’Asturies nel festival.
La TPA va retresmitir en directo la gala, ¿va haber munchos más medios de fuera?
Tovía falten por confirmar coses, pero van acudir periodistes de les televisiones vasca, friulana, frisia, samí y corsa. Radio Sele tamién va tar en Xixón, amás del fotógrafu oficial del Conseyu d’Europa y periodistes del periodicu de Leeuwarden, la capital de Frisia. Per otru llau, nestos momentos, dende Política Llingüítica tamos trabayando pa consiguir más presencia medíatica.
Nun sé si pue confirmame qu’autoridaes van acudir a la gala…
La conseyera d’Educación y Cultura, el presidente d’Asturies y les autoridaes de Xixón tan convidaos, como nun podía ser d’otra manera. La conseyera va tar nel festival y tamién nos actos paralelos que se van celebrar con motivu del Liet na Universidá d’Uviéu. El presidente tien el procuru de poder asistir, pero too depende de la so axenda d’actos y tovía ye ceo pa confirmalo.
¿Qué más actos van celebrase?
El día 30, pela mañana, hai un alcuentru colos estudiantes nel Salón d’Actos de la Biblioteca de la Facultá de Filosofía y Lletres, nel Campus del Milán. Ta entamáu baxo l’hospiciu del decanatu de Filosofía y Lletres y va contar cola presencia d’Ana Cano, presidenta de l’Academia de la Llingua; Alexey Kozhemyakov, secretariu de llingües minoritaries del Conseyu d’Europa; y Onno Falkena, coordinador del Liet, amás d’otros representantes de llingües minoritaries europees. L’actu va abrilu la conseyera y, depués, los ponentes van ser recibíos na Xunta Xeneral y van facer una visita guiada. Por cierto, el presidente tien un interés especial n’atendelos y da-yos la bienvenida a Asturies.
¿Hai dalgún contactu con otres asociaciones o empreses que trabayen pola cultura y llingua asturiana pa que participen nos actos?
La invitación ye a tola xente asturiano. Ye un actu de baldre, qu’amás nun ye nada común -participen once comunidaes llingüístiques europees-. Por eso, tán convidaos tolos Conceyos y toles entidaes representatives del panorama social, cultural y políticu d’Asturies. Dende equí, prestaríame convidar a tolos asturianos a dir a La Llaboral y enllenar el teatru pa, asina, poder ver un festival onde s’axunten llingua y cultura, y per ende Asturies, que pela primer vez vamos entamar un festival d’esti calter.
Nel festival participen once grupos, ¿hai dalgún que-y preste más qu’otru?
Amás de que son mui bonos, yo tengo que dicir l’Asturiana Mining Company. Parezme que va ser un festival mui bono. Tuvi viendo los videos de los cantares participantes y hai muncha calidá. Amás de l’Asturiana tengo dalguna que me presta enforma, pero nun lo voi dicir porque taría faciéndo-yos publicidá [Rise].
(de Les Noticies, 28-11-2012)
Tierra alantre, la mesma fala 
Deixar ua Respuosta