Iniciativa pol Asturianu considera que’l Ministeriu de Fomentu “manipula la llexislación al so favor” pa nun cumplir cola toponimia oficial d’Asturies. Ye la resmpuesta de l’asociación de reivindicación llingüística a lo dichu nestos díes pol departamentu d’Ana Pastor ente la entruga d’un diputáu d’Izquierda Xunida por petición d’Iniciativa pol Asturianu al rodiu del usu de los nomes oficiales nes carreteres asturianes de competencia estatal.
El Ministeriu argumenta que la única llingüa oficial del país ye’l castellanu polo que nun considera oportuna la rotulación cola toponimia oficial aprobada pola Xunta Xeneral.
N’Iniciativa pol Asturianu, aseguran que “si bien l’asturianu nun ye oficial, la toponimia tradicional recuperada y aprobada pol Gobiernu d’Asturies sí que tien esi rangu, y ye d’usu obligáu pa tolos estamentos públicos, incluyíu’l Ministeriu que xestiona les carreteres estatales”.
La normativa que cita Fomentu refierse a la rotulación d’información nes señales, casu de lletreros como ‘toles direcciones’, ‘salida’, o ‘centru ciudá’, que nes carreteres estatales tien que ponese nes llingües oficiales del territoriu pel que pasa, pero en nengún casu a la topinimia. “Los nomes de llugar tienen que ponese en tolos casos na forma na que tán oficializaos nel BOPA”.
Énte esta respuesta, Iniciativa pol Asturianu va solicitar un conceyu col delegáu del Gobiernu central n’Asturies, Gabino de Lorenzo, y el responsable de Fomentu na comunidá, “al envís de buscar solución a esta llamentable situación d’illegalidá, amás d’aprovechar pa tratar otres cuestiones d’importancia pal idioma y que dependen del Gobiernu d’España”.
(del Qué ye ho, 26-12-2012)
Tierra alantre, la mesma fala 
Ye que, técnicamente, el topónimu nun ye nin n’asturianu nin en castellán, ye’l topónimu. Lo que notres Comunidaes nun supón ningún problema, paez que n’Asturies ye una movida de la de mi madre.