La poeta sierense Ángeles Carbajal acaba de proclamase ganadora, na mañana de güei, de la XXII edición del Premiu Teodoro Cuesta de Poesía, quiciabes el más prestixosu de los premios poéticos en llingüa asturiana, col poemariu En campu abiertu.
El premiu ta dotáu con 3.000 € y ta patrocináu pol Ayuntamientu de Mieres y la Conceyalía d’Educación, Cultura y Deporte del Gobiernu del Principáu d’Asturies. La obra ganadora va ser editada por Ediciones Trabe.
El Xuráu reuniose na Casa de Cultura Teodoro Cuesta de Mieres del Camín y tuvo integráu por Esther Prieto, María Antonia Pedregal, Vicente García Oliva, Ismael María González Arias y Xuan Bello; actuando como presidente del xuráu Manuel Ángel Álvarez y secretariu Jesús Fernández Álvarez, dambos ensin voz nin votu.
Tres una primer ronda de delliberaciones quedaron como finalistes los poemarios Vida nueva, presentáu baxu’l pseudónimu de Tristán García; En campu abiertu, presentáu baxu’l pseudónimu de Lescar; y Hai que lo saber anguaño, presentáu baxu’l pseudónimu de Xuan del Baile. Los miembros del xuráu destacaron la calidá d’estos trés finalistes, decidiendo tres d’ello, por unanimidá, conceder el XXII Premiu Teodoro Cuesta de Poesía al poemariu tituláu En campu abiertu, en cuya plica correspondiente resultó ser autora Ángeles Carbajal.
El Xuráu destacó la sorprendente voz propia d’una poeta hasta agora casi inédita, pero dafechu bien formada. Facía yá ocho años desque’l premiu de poesía tuviera como ganadora una muyer, dempués de qu’en 2004 Marta Mori s’alzase col galardón, recoyendo’l testigu del añu anterior, en que lo ganara Vanessa Gutiérrez; Ángeles Carbajal suma’l so nome al d’autores como Esther Prieto, Lourdes Álvarez o Berta Piñán, ganadora de la primer edición del premiu, en 1991.
Ángeles Carbajal (Argüelles –Siero-, 1959). Llicenciada n’Hestoria del Arte pola Universidá d’Uviéu, ye conocida ente los llectores asturianos por haber empobináu diversos talleres de llectura y creación lliteraria p’adultos promovios pola Obra Social y Cultural de Cajastur y tamién pol Conceyu d’Uviéu. Collaboradora en revistes Lliteraries como Reloj de Arena y Clarín, foi una de les impulsores de l’asociación lliteraria “Voces del Chamané”. Tien publicaos los llibros La Caligrafía de la Distancia (Cuadiernos del Bandoleru, 1993) y La sombra de otros días, (Editorial López y Malgor, 2002).
A la espera de ver editáu’l poemariu agora galardonáu, podemos lleer una amuesa de la so poesía na web http://www.portaldepoesia.com, onde ye accesible el so poemariu La sombra de otros días.
Tierra alantre, la mesma fala 
Deixar ua Respuosta