L’Ayuntamientu de Noreña vuelve a refugar escritos n’asturianu

Casu nuevu de represión llingüística en Noreña. L’alcalde del municipiu, Cesar Movilla, niégase a tramitar dos solicitudes de documentación de Conceyu Abiertu con fecha d’entrada nel rexistru del 17 y 21 d’esti mes, por tar escritos n’asturianu. Trátase en dambos casos de testos cenciellos nos que se pide documentación: el día 17 un llistáu con documentación en xeneral de dellos temes (ponte del rebalde, actes de plenos celebraos, les normes subsidiaries que sostituyen al PGOU, los presupuestos de 2012, el borrador de los de 2013) y nel casu del 21 d’una copia de los antecedentes de les comisiones celebraes güei.

Sicasí, foi precisamente güei cuando l’Ayuntamientu fixo estrega d’una carta de contestación onde l’alcalde comunica que “previo a su tramitación deberá presentarlos en lengua castellana”. Conceyu Abiertu argumenta que los testos son dafechamente entendibles y cenciellos, simplemente se trataría de dar el so consentimientu pa que se facilite al Grupu Municipal una copia de los documentos pedíos. “La postura antiasturiana del alcalde ye bien conocida y ta suficientemente documentada, pareznos que nesta ocasión tamién se trata d’una nueva esculpia pa torgar un normal accesu a la información, como venimos denunciando tolos grupos de la oposición dende l’aniciu de la llexislatura”.

Consideren que nesta decisión confluín dos oxetivos: torgar “tolo posible”’l llabor de los conceyales de la oposición y la “represión constante” al derechu a utilizar l’asturianu: “La Noreña de Movilla tien una perbaxa calidá democrática”. Conceyu Abiertu pide “reaniciar la busqueda d’una formula que permita aprobar una midida nel ámbitu municipal, que solucione esta grave discriminación que prohibe de facto, por causa de la nula voluntá de los gobernantes, l’usu escritu del asturianu”.

L’actitú del alcalde del PSOE choca col propiu programa de la llista ellectoral qu’encabezaba. Nel puntu 63 del programa ellectoral comprométense colos vecinos a “Potenciar la normalización social del asturiano”. “Quixéremos saber qu’entiende’l PSOE y Movilla por normalizar l’asturianu”.

(del Qué ye ho!, 24-01-2013)