El próximu vienres día 1 de marzu tendrá llugar la Gala d’entrega del VII Premiu al Meyor Cantar. L’escenariu sedrá’l Teatru de la Llaboral, en Xixón. L’actu entamará a les 20:30 hores y la entrada será llibre. Amás, será posible siguilu pela TPA.
El 19 de xineru cerró’l plazu pa que los interpretes o grupos interesaos solicitaren la so participación nesta sétima edición del premiu. Un xuráu formáu por espertos en música y llingua asturiana escoyó d’ente los presentaos a los cinco finalistes, qu’actuarán en directo na Gala d’Entrega del Premiu’l 1 de marzu.
Los artistes y cantares finalistes na presente edición son los que darréu reseñamos:
– ACD, con “La güela” (lletra: Adolfo Camilo Díaz). ACD ye l’acrónimu d’Adolfo Camilo Díaz, historiador, escritor, dramaturgu, xestor cultural, videocreador y músicu. Nel añu 2012, esti autor publicó el CD «RA MAI» col oxetivu de continuar el llabor aniciáu nel 2010 de llevar a la llingua asturiana dalguna de les pieces más conocíes y reconocíes del rock mundial, pieces coles que Adolfo Camilo Díaz foi construyendo la so memoria sentimental. Nesti discu, presenta tamién cuatro temes propios (ente ellos, «La güela», seleccionáu nesta edición del Premiu al Meyor Cantar).
– Aire, con “Enzo” (lletra: Ruma Barbero de Diego). El grupu Aire, del que formen parte los músicos Mapi Quintana, Jacobo de Miguel, Xuan Nel Expósito, Elías García y Fernando Arias, presentóse nel añu 2012 col oxetu de dotar a la música asturiana d’anguaño d’un trabayu discográficu dedicáu a l’acordión diatónica o de botones, un instrumentu perimportante na música tradicional que casi nunca foi’l protagonista d’un trabayu discográficu. El tema col qu’esti grupu va competir na Gala del Premiu al Meyor Cantar ye un homenaxe a Enzo Ferrero, xugador del Real Sporting de Xixón nes décades de los setenta y ochenta del pasáu sieglu.
– Fala non caduca, con “Escoyer el camín” (lletra: Adrián González Pérez). Esti grupu naz a primeros del 2007 de la inquietú que sintieron dellos componentes de bandes moces asturianes por esplorar posibilidaes sonores nueves. El grupu etiqueta’l so soníu como “Mecigayu son”, al recoyer influencies ska, rock, funk, reggae, hiphop o metal mecíes con un componente identitariu asturianu claru y con presencia de la gaita nes sos composiciones. Amás, Fala Non Caduca fai gala de la so actitú comprometida y reivindicativa pa cola situación de la llingua asturiana, los conflictos llaborales o la defensa del mediu ambiente. Esta banda llama nos sos cantares a actuar pa camudar les situaciones adverses.
– La Tarrancha, con “Qué faer!” (lletra: Delfín Valdés). La Tarrancha naz nel 2003 de la fusión de dos grupos esistentes daquella (Zemba y Faiunflai) y cola idea de facer música d’influencia xamaicana, básicamente Ska y Reggae, pero saliéndose de purismos y intentando dotar la so música d’otres influencies. Na actualidá, la música que fai La Tarrancha ye pura fusión que parte de los ritmos xamaicanos pa mezclase con otros soníos que van dende la música asturiana a los ritmos llatinos, balcánicos, rusos, franceses…, lo qu’ellos dende el entamu denominaron Mecigayu Ska, el so propiu soníu.
– Taranus, con “Ensin ti” (lletra: Diego Díaz Martino). Depués de participar nos últimos años nun par de grabaciones de discos compartíos, el añu 2012 vio apaecer el primer trabayu discográficu de Taranus, grupu con un estilu que s’encuadra nel folk-metal, con un soníu cercano a los grupos alemanes d’esti xéneru y con abondes influencies del folk escandinavu. El tema col que van competir nesta edición del Premiu al Meyor Cantar ye «Ensin ti», una balada cantada a tres voces.
L’espectáculu va zarrase cola actuación d’Asturiana Mining Company, grupu vencedor na edición anterior. Fundáu por Michael Lee Wolfe nel añu 1998 con músicos mui conocíos de la escena folk, rock y jazz n’Asturies, la formación grabó nel añu 2000 el so primer discu, col títulu Patrimoniu. A finales del 2011, Asturiana Mining Company editó un discu nuevu: Sones por Berto Velasco, un trabayu onde destaquen la voz y la gaita del maestru Alberto Varillas, los arreglos vocales de Silvia Fernández y l’acordión zydeco de María Álvarez. «Si nun conoces Val.louta» fue’l tema col que ganaron la sesta edición del Premiu al Meyor Cantar y col que concurrieron al Liet International 2012, que tuvo llugar en Xixón, nel mesmu teatru de la Llaboral, el pasáu 1 d’avientu, resultando ganadores del Premiu del Públicu.
De los cinco finalistes d’esti añu, el grupu o intérprete ganador va representar internacionalmente a Asturies nel Festival de la Canción en Llingües Minoritaries Liet International, organizáu col apoyu del Conseyu d’Europa y que na so edición de 2013 tendrá llugar en Córcega.
A partir del 15 de febreru, tola información d’ésta y les ediciones anteriores del Premiu al Meyor Cantar va tar disponible nel sitiu web del concursu (www.premiumeyorcantar.es), onde se van ufrir noticies, fotografíes y información de los grupos y cantares finalistes. Amás d’ello, un reproductor va permitir sentir los temes que compiten na Gala.
El Gobiernu del Principáu d’Asturies instituyó esti Premiu nel añu 2007 col oxetivu de consolidar, arriquecer y prestixar la creación musical asturiana. D’alcuerdu coles bases, pueden optar a esti galardón les canciones con lletra n’asturianu o gallego-asturianu que se comercializaron ente’l 1 de xineru y el 31 d’avientu de 2012, siempre que sean obres musicales de creación orixinal. Queden excluyíes les pieces tradicionales yá esistentes, les versiones o adaptaciones d’obres de creación publicaes orixinalmente n’otra llingua, y les canciones que nun s’editaren y grabaren per primer vez nel citáu añu 2012.
(del Gobiernu del Principáu d’Asturies, 10-02-2013)
Tierra alantre, la mesma fala 
Deixar ua Respuosta