Según despliquen, “L’Atenéu N’Alfoz ñaz del enfotu de ciudadanes y ciudadanos de los conceyos d’Avilés, Castrillón, Corvera ya Illas pa crear una entidá cívica centrada nes cuestiones culturales y llingüístiques, que desendolque’l so llabor principalmente nesti ámbetu territorial conocíu como la Comarca d’Avilés”. L’orixe d’esta entidá “remóntase meses atrás, dempués de dellos alcuentros ente persones veníes de distintos ámbetos de lo que se puede denomar l´asturianismu social”.
Tal como treslladen dende l’Atenéu, “nestos alcuentros aldericóse sobre la situación de la llingua, padremuñu y cultura d’Asturies, de la situación actual del movimientu asturianista nestos conceyos y de les actuaciones que dende les instituciones se tienen nestes cuestiones”. Como oxetivos aniciales, planteguen “promover llugares d’alcuentru ente los asturianistes d’estos conceyos, esparder la llingua y cultura asturiana, reivindicando la normalización y oficialidá del asturianu y acercar l’ideariu del asturianismu a la sociedá”.
Pa l’Atenéu N’alfoz, ye importante enfotase “na organización propia d’actos y actividaes culturales, ellaboración de materiales, campañes y actos de reivindicación”, afitando tamién la importancia de “crear llugares d’alcuentru ente ciudadanes y ciudadanos y entidaes yá existentes. Creemos fundamental la collaboración con entidaes que compartan los mesmos oxetivos del Atenéu”.
(d’Infoasturies, 01-04-2013)
Tierra alantre, la mesma fala 
Deixar ua Respuosta