PABLO R. GUARDADO
La Biblioteca del Conceyu de Carreño acueye hasta’l 31 de mayu una esposición sobre Carlos Benito González de Posada. El SNL de la Mancomunidá d’El Cabu Peñes organiza esta muestra xunto a otros coleutivos de la zona.
Les persones que s’averen a la esposición podrán ver artículos de prensa sobre la vida y obra d’esti arqueólogu y historiador candansín nacíu nel 1745 y fináu nel 1831 en Tarragona, amás d’otros espublizaos nos porfolios de les Fiestes del Cristu. Tamién hai abonda documentación bio-bibliográfica del autor y papeles dixitalizaos de documentos orixinales, facsímiles, testos autógrafos y cartes procedentes de delles fontes como l’Academia de la Historia, el Muséu del Pueblu d’Asturias, la Biblioteca del RIDEA, la Biblioteca d’Asturies, el Muséu Arqueolóxicu d’Asturies, l’Archivu Diocesanu y particulares, ente otros. La muestra complétase con obres de Gaspar Melchor de Xovellanos dedicaes al que foi’l so collaciu, videos o paneles.
La esposición, entamada pol Conceyu de Carreño y organizada pol Serviciu de Normalización Llingüística de la Mancomunidá d’El Cabu Peñes, la Biblioteca Municipal Pública Carlos González Posada y el Centru de Dinamización Tecnolóxica de Carreño en collaboración cola Conseyería d’Educación, Cultura y Deporte, va poder visitase hasta’l 31 de mayu de llunes a vienres, n’horariu de 11 a 13.30 hores y de 16 a 20.30 hores, y los sábados, de 10.30 a 13.30 hores.
(d’Asturies.com, 23-04-2013)
Tierra alantre, la mesma fala 
Deixar ua Respuosta