«L’accesu a la llingua por internet fai les coses más cencielles»

ENRIQUE CARBALLEIRA

David Melendi Palacio, profesor de la Universidá d’Uviéu, fue nomáu miembru correspondiente de l’Academia de la Llingua Asturiana (ALLA). Melendi foi Decanu del Colexu Oficial d’Informáticos del Principáu d’Asturies y anguaño ye profesor titular de Universidá nel área de la Inxenería telemática. Los sos trabayos alredor del asturianu lleváronlu a formar parte de proyectos d’investigación como’l Proyectu Eslema y la so posterior aplicación al traductor col mesmu nome. Tamién participó de la ellaboración de la ‘Terminoloxía d’internet y d’interfaces pa programes informáticos en llingua asturiana’ asoleyada pola institución.

¿Qué supón esti nomamientu?
Pues un honor, claro. Quedé ablucáu, pero tamién te digo que prestome pola vida.

L’Academia de la Llingua yá ufre delles ferramientes y materiales n’Internet. ¿Qué importancia tienen pal crecimientu y meyora de la llingua?

Son perimportantes como preseos de consulta, por ser más afayadizos que los materiales en papel. Quiciabes hai xente que escribe n’asturianu y tien duldes que, en papel, son más difíciles de resolver. Pero l’accesu por internet fai les coses muncho más cencielles. Por exemplu, yo tengo’l diccionariu la llingua en papel pero namás uso el d’internet.

¿Qué ye Eslema?
Ye un proyeutu d’investigación entamáu polos Departamentos de Filoloxía Española y d’Informática de la Universidá d’Uviéu que tenía como oxetivu facer un corpus llingüísticu asturianu. Dempués fueron surdiendo nuevos oxetivos hasta’l desendolcu del sistema de traducción, que quiciabes ye el resultáu más conocíu.

Un sistema de torna que supón una bona rimpuesta a les necesidaes de muncha xente…
La verdá ye que toi recibiendo demasiaos reconocimientos por esti proyeutu, cuando les mios aportaciones fueron perpequeñes. La parte téunica llideróla el profesor del Departamentu d’Informática Xelu Neira Álvarez. Yo na más eché dalgún gabitu.

¿Tien esperanza cola posible llegada de la oficialidá?
Ye dalgo de lo que se vien falando fai munchos años, pero que sigue igual pase’l partíu que pase pol poder. Parezme que la mayoría los políticos, o los que más se sienten, namás que se dediquen a encismar col tema. Albidro que buscando el so porgüeyu propiu. Agora salen col discursu la obligatoriedá, que na más lu entienden ellos, escaeciendo los derechos de la xente.

La crisis tampoco ayuda munchu.
Angüaño entiendo qu’esti tema también ta nun segundu planu pola situación xeneral del país pero, pa mi, somos comedores d’hamburgueses y falantes de dalgo asemeyao al inglés en potencia. Entrúgome si los europeos queremos ser culturalmente iguales dientro 50 años.

(d’El Comercio, 04-05-2013)