Un pesimismu moderáu

MIGUEL ROJO

Hasta cinco veces se mentó ayer nel Museu de la Sidra de Nava al artículu publicáu nesti periódicu por Ramón d’Andrés -presidente de la Fundación Caveda y Nava, que convocaba l’actu-, Vital d’Andrés -que taba ente’l públicu- y Alfredo Álvarez, nel qu’alertaben del desapegu de la sociedá asturiana pa cola llingua y del so riesgu de desapaición. Un riesgu nel que tolos participantes, nel alderique que se celebró ayer pola mañana, taben bastante d’alcuerdu, lo que dexó nel aire ciertu tufu a pesimismu, anque moderáu. Pesimismu porque a partir de les cifres, datos y baremos que se plantegaron, toos reconocíen que l’asturianu ye una llingua «en pelligru», y compruébase que «a pesar de delles meyores nel so prestixu, ta perdiendo falantes».

Pilar Fernández, doctora en Filoloxía y profesora de Secundaria, depués de citar l’artículu publicáu n’El Comercio como un bon analís «pa saber d’onde partir», afirmó que «la mayor responsabilidá na perviviencia d’una llingua ta na comunidá de falantes», a quien animó a «usar l’Asturianu nos sos ámbitos, na empresa, na cai, nes asociaciones…». Hasta animó a «tener fiyos y falayos n’asturianu». Tamién calificó de «imprescindible» la oficialidá como oxetivu a llograr «polos compromisos políticos y sociales que trai», amás de destacar necesidaes nel sistema educativu: «Nun pue enseñase igual a los falantes que vienen col asturianu de casa qu’a los que nun son falantes», dixo.

L’editor y escritor Antón García destacó que, a pesar de la perda de falantes, «tamos recuperando conciencia llingüística», y apostó por «llevar nós l’asturianu a la xente, non facer que la xente vaya a l’asturianu». Recuperó un conceutu de Xandru Fernández, «la señaldá del PNV», pa referise a la falta d’un partíu políticu asturianu -suponse que mayoritariu- que garre la bandera del asturianismu llingüísticu. Ante esa falta, apuesta pola «unión y el asociacionismu» pa tratar de meyorar una situación «que lleva 500 años caminando escontra la sustitución per parte del castellanu».

La filóloga ya investigadora Taresa Lorences enseñó dellos exemplos de cómo l’asturianu úsase na cai, con conversaciones grabáes n’Uviéu. «L’asturianu nun ta muertu», recordó, «predomina nes comunicaciones, ocupa ámbitos que nun ocupaba, sigue tresmitiéndose… Ye una bona base pal futuru», apuntó. David Guardado, filólogu tamién, sollertó de la progresiva castellanización del llinguaxe na cai, y de los pilancos pa que l’asturianu se tresmita nes families a los fiyos. «La televisión y l’escuela tán en castellanu», recordó ante los más optimistes.

Tres dellos intercambios d’opiniones, toos apostaron pola unión de fuercies pa tratar de ganar el sofitu de la sociedá. «Que nun caminemos nuna direición y que naide venga detrás cuando deamos la vuelta», avisó Ramón d’Andrés. Hasta la direutora xeneral de Política Llingüística, Ana Fueyo, que tuvo presente nos más de trés hores d’alderique, dixo del asturianu que «enxamás naide nin nada va poder quitánoslu de les manes, y más si eses manes tan coyíes unes a les otres».

(d’El Comercio, 02-06-2013)