“La llingua asturiana ye la principal seña d’identidá del Pueblu Asturianu”

Entrevista a Daniel Cueli Canto, direutor de “N’Ast. Cartafueyos d’Ensayu” (Infoasturies Radio. Avientu 2013)

¿Cómo deplicaríes a los que mos sienten qué ye “N’Ast” y el llabor que facéis dende fai tantos años?
“N’Ast” ye una asociación cultural ensin ánimu de llucru aniciada’l 20 d’ochobre de 2006 col enfotu de puxar pola cultura tradicional asturiana, anque especialmente no tocante a la llingua, la nuesa principal seña d’identidá. Pa ello, dende’l so entamu vieno desendolcando una importante riestra d’actividaes, como campañes informatives, concentraciones ciudadanes, edición de la revista “N’Ast. Cartafueyos d’Ensayu”, etc.

Tais a piques d’asoleyar un nuevu númberu de la vuesa revista “N’Ast. Cartafueyos d’Ensayu”, ¿qué va atopar la xente nél?
La verdá ye que’l númberu nueve de la revista ye un númberu “hestóricu”, nun sólo porque ye’l primeru qu’asoleyamos ensin tener subvención, que tamién por eso, sinón porque los artículos qu’incluyimos son toos de temática hestórica. Asina, Xuan Porta Allende úfremos un interesante artículu sobre l’interesáu remanamientu de la hestoria d’Asturies; Natalia Fernández Jimeno apúrremos unes notes sobre les carauterístiques de los totalitarismos y la so aplicación al facismu español. “La llucha de clases na Corona de Castiella” ye’l trabayu qu’iguaren a comuña Eduardo Abad García y Sergio Alonso Pampliega. Por último, Javier Cubero de Vicente preséntamos l’ensayu “El republicanismu federal na Asturies decimonónica”, nel que mos avera al impautu que tuvieron les idegues de Pi i Margall nel nuesu país.

Ye un númberu añal, ¿cómo ye’l trabayu de coordinación de los estremaos artículos que s’escriben na revista?
Pues la verdá, nun ye un trabayu escesivamente complicáu. Hai dos regles que, de man, tratamos de cumplir siempres: nun repetir autor o autora en dos númberos de la revista siguíos y que’l llargor de los trabayos a asoleyar nun pase de les venti fueyes. Tratamos de respetar estes dos regles na midida lo posible, unes vegaes conseguímoslo y otres non, depende del material que tengamos pa cada númberu. Llueu, si dalgún artículu mos llega en castellán, decidimos quién s’encarga de la torna, que ye revisada por otra persona estremada a la que la fizo. Por último, ta el procesu de maquetación, del que s’encarga tamién un miembru de l’asociación y que nesti casu reviso yo.
Una de les vueses actividades más nomaes ye la denuncia constante de la situación del asturianu, ¿cuánta xente ta echando un gabitu nesti llabor na asociación?

Home, supongo que comu en tolos coleutivos, trabaya menos xente de la que mos prestaría, h.e, h.e… Anguañu hai cincu persones que llevamos el día a día de l’asociación, entamando pola presidenta, que ye la que normalmente atiende a los medios de comunicación y la que mos representa ellí onde mos llamen. Hai otra persona que s’encarga de la páxina web, el nuesu principal mediu de comunicación pa colos socios, simpatizantes y cola sociedá en xeneral, y otres dos persones más que son les encargaes de tar sollertes a tolo que pasa en rellación cola nuesa llingua y de denunciar lo qu’heba que denunciar. Y por último toi yo, que soi l’encargáu de la revista. Eso sí, cuandu fai falta tirar de dalgún sociu pa daqué llabor nun tenemos problema porque, evidentemente, tenemos más xente detrás d’esti “equipín” de cincu persones.
Dende “N’Ast”, ¿cuála ye la vuesa opinión de cómo ta l’asturianu anguaño y el so futuru a curtiu y llargu plazu?

Yo, personalmente, creo que l’asturianu nun va morrer y que tien futuru, tanto a curtiu comu a llargu plazu. Eso sí, pa ello ye perimportante que se declare la so oficialidá yá, como preséu cimeru pa garantizar los drechos llingüísticos del pueblu asturianu y una normalización social efeutiva de la llingua. Si esa oficialidá tarda muncho en llegar el futuru va ser complicáu… Y ye que tamos nuna dómina na que, nun sé si ye aprovechándose d’esta mal llamada crisis económica y usando aquello del “nun hai perres” como escusa, tamos dando pasos p’atrás, en llugar de p’alantre. Concretamente, a min lo que más m’esmolez ye la perda de los meyores falantes, ello ye, la xente vieyo que va morriendo, y la escolarización, preséu fundamental pal futuru del asturianu, na qu’añu tres añu danse situaciones vergoñoses, nun sólo porque nun esiste un enseñu dafechu n’asturianu, nin siquiera porque ye una asignatura que tenía de ser obligatoria en toles etapes educatives, sinón porque, siendo voluntaria, pónense tolos pilancos pa que los escolinos y escolines la puedan cursar.

Otra de les campañes que tais iguado ye la de la torna d’estremaes ferramientes y plataformes informátiques al asturianu, ¿qué importancia-y dais al usu de les nueves teunoloxíes pal espardimientu del nuesu idioma?
Dende va unos años les nueves teunoloxíes tan teniendo un papel perimportante en munches estayes de la vida, y ca vegá más. La llingua asturiana creo se ta beneficiando de les mesmes y que tan siendo un bon preséu pal so espardimientu y la so normalización social. Nel nuesu casu concretu, tres munchu tiempu furrulando con una páxina web fecha pa salir del pasu, a primeros d’esti añu punxímonos en serio a iguar una web curiosa con un nuevu diseñu y munchos más conteníos porque, en cierta manera, nun dexa de ser la imaxen del coleutivu na rede. Amás, dende va un tiempu tamién tenemos presencia en Facebook y en Twitter, les dos redes sociales más importantes.

La non oficialidá del asturianu torga la so reconocencia y amás la perda de perres dende una montonera d’instituciones, ¿camentais qu’esta llaceriante situación pue llegar a camudar?
Ye complicao que camude mientres na Xunta Xeneral d’Asturies y nos Conceyos sigan representaes les sigles polítiques de siempres, o mientres dientro d’esos partíos políticos nun se produza un cambiu real de mentalidá y de voluntá haza la custión llingüística. Pero pa esto tamos nós y otros coleutivos, trabayamos col enfotu de que tamos poniendo’l nuesu granín de sable pa qu’esta situación cambie…

¿Faríes un llamáu a los que mos sienten alrodiu la necesidá de ponese al llabor pola recuperación y diginificación del asturianu na nuesa sociedá?
Por supuesto, y más nesta dómina na que paez qu’hai coses más importantes qu’esmolecese pola cultura, en xeneral, o pola llingua asturiana, en particular. El llamáu ye bien fácil de facer porque llevamos dende l’aniciu de l’asociación repitiéndolu: tenemos que mirar pol asturianu porque nun sólo ye la llingua vehicular de miles d’asturianos y asturianes, sinón porque ye la principal seña d’identidá del pueblu asturianu, una d’eses señes que mos identifica como asturianos nel mundu.

¿Onde puen les persones que tean interesaes en collaborar o conocer el vuesu trabayu, contautar con vós?
Pues aquelles persones interesaes en contautar cola Asociación Cultural N’Ast pueden facelo físicamente, y al traviés del corréu postal, nel Llar Social L’Ayalga, que ta na cai Decanu Prendes Pando, númberu 11, de Xixón y al traviés del corréu lletrónicu nast.oficialida@gmail.com.

(de N’Ast, 16-01-2014)