L’Academia de la Llingua Asturiana vien siguiendo “con esmolición los continuos casos de discriminación llingüística que tán sufriendo los ciudadanos del Conceyu de Noreña a lo llargo d’estos años pola actitú del so alcalde, D. César Movilla, pa col usu de la llingua asturiana na vida diaria del conceyu.
La cabera decisión del alcalde de Noreña de refugar la petición d’un coleutivu de “Paraos y Precarios de Siero y Noreña” por tar redactada n’asturianu, ye pa la máxima institución llinguísitca asturiana, “una vegada más una falta de respetu hacia la llingua y la cultura asturiana –ya inda más, hacia’l propiu derechu de los ciudadanos del conceyu a usar la llingua d’Asturies”.
N’efeutu, refugar el mentáu escritu cola xida de tener que tar “redactada en castellano, lengua oficial de esta Comunidad Autónoma”, da cuenta “perfeutamente del allugamientu, oxetivamente anti-asturianu, del Sr. Alcalde y del so desconocimientu del marcu xurídicu qu’ampara’l derechu de los ciudadanos al llibre usu de la llingua asturiana”, sorraya l’ALLA nel so comunicáu.
Con too, l’Academia de la Llingua Asturiana treslladó a la FSA-PSOE (partíu al que pertenez l’alcalde) la so “más fonda preocupación y perplexidá énte esti nuevu atropellu a la llingua asturiana” y encamentó-y poner igua a una actuación que, n’opinión de la institución, “con toa xusticia, podría calificase de pre-constitucional y antiestatutaria”.
(d’Infoasturies, 29-01-2014)
Tierra alantre, la mesma fala 
Deixar ua Respuosta