Investigadores del Seminariu de Filoloxía Asturiana van tar presentes en Madrid nel alcuentru añal de la rede Wedisyn. Ésta ta formada por grupos d’investigación en sintaxis dialectal de llingües falaes na Península Ibérica y nel Estáu francés.
L’Alcuentru Wedisyn (Westmost Europe Dialect Syntax) va tener llugar el xueves y el vienres nel Departamento de Filología Española de la Facultad de Filosofía y Letras de la Universidad Autónoma de Madrid y nél van tar representaes, amás de la llingua asturiana, el portugués, el gallegu, l’eusquera, el castellanu, el catalán y el bretón. La representación asturiana va protagonizar la primer charra de les xornaes, a les 10 hores, con ‘Los alomorfos de los pronombres clíticos y su variación geolectal en la zona Eo-Navia (Asturias)’. Nella van participar Ramón d’Andrés, Fernando Álvarez-Balbuena, María Cueto, Miguel R. Monteavaro y Xosé Miguel Suárez Fernández ‘Tapia’. Mentes, el vienres, tamién a les 10 hores, Xulio Viejo va poner la ponencia ‘Completando el cuadro de los pronombres asturianos’.
Uviéu acoyó l’alcuentru añal de la rede Wedisyn nel añu 2012, siendo otres sedes dende l’entamu d’estes cites nel 2009 Baiona, Barcelona y Santiago de Compostela. Estes xornaes tienen como oxetivu compartir los trabayos entamaos por cada grupu d’investigación con cuenta d’enveredar la collaboración ente los sos miembros y promover l’interés pol estudiu de la variación sintáctica nel entornu académicu y estudiantil. Nel casu del alcuentru de Madrid, el Comité d’Organización ta formáu polos profesores Inés Fernández-Ordóñez, Víctor Lara Bermejo, Ana Estrada Arráez y Olga León Zurdo (Universidad Autónoma de Madrid); Javier Rodríguez Molina (Universidad Carlos III de Madrid); y Carlota de Benito Moreno (Universität Zürich).
ANEXU: Programa Wedisyn 2014.
(d’Asturies.com, 23-04-2014)
Tierra alantre, la mesma fala 
Deixar ua Respuosta