La Oficina de Normalización Llingüística del Ayuntamientu de Xixón presentó´l xueves 11 de setiembre nel Antiguu Institutu Xovellanos a les 13.00 hores, el Pallabreru del monte y la escalada, continuando d´esta miente col llabor de difusión, usu y normalización del asturianu nel Conceyu. Nesta ocasión, realízase coincidiendo xusto col Campeonatu Mundial d’Escalada qu’entama la Federación Internacional d’Escalada de Competición col sofitu del Patronatu Deportivu Municipal del Ayuntamientu de Xixón/Gijón, y que se cellebra del 8 al 14 de setiembre.
En Xixón y n´Asturies, cuntamos con muncha xente que practica esti deporte en dalguna deles sos especialidaes. Poro, nun ye raro esta afición, si camentamos que´l nuesu país, ta enllenu de montes que permiten non sólo algamar -col conocimientu del mediu y col dominiu de les técniques a emplegar y coles habilidaes d´unu mesmu-, cotes d´axilidá, rapidez… sinón tamién conocer los requexos que nos aguarda en cada percorríu (marcha), esfrutar del paisaxe y sentir l´afán de superación cuando se llega al puntu de destín.
Esti pallabreru, aliméntase como diz nel prólogu Rosa Fernández Rubio -asturiana de Cangas del Narcea, primera y única muyer n’España que completa’l retu de les Siete Cumes, los montes más altos de tolos continentes-, “de pallabres que ya gastaben los nuesos bisgüelos y qu’arrecienden a mofu y sudor, y d’otres garraes de llingües foriates con aromes a diseñu y llaboratoriu”.
El testu de Berto Xuan Alcoceba recueye amás del pallabreru una esbilla de toponimia del monte qu’esperamos que vos preste.
Na presentación tuvieron:
Carlos Rubiera Tuya, Conceyal d’Educación, Cultura, Xuventud y Festexos
Pedro Javier Barbillo, Conceyal de Rellaciones Ciudadanes, Servicios de Proximidá y Deportes
Xosé Nel Riesgo, Director de la FMCE y UP
Berto Xuan Alcoceba, autor del contenío
Rosa Fernández, escaladora y alpinista
ANEXU: Pallabreru del monte y la escalada.
(del Ayuntamientu de Xixón, 5-09-2014 [sic], vía Camudando’l camín, 11-09-2014)
Tierra alantre, la mesma fala 
Gracies por espardilu… un abrazu