La vixésima edición del Premiu Máximo Fuertes Acevedo de Ensayo n’asturianu, con una dotación de 3.000 euros, recayó en Damián Barreiro Maceiras. A esti galardón, que concede la Conseyería d’Educación, Cultura y Deporte, podíen presentase obres de tema, xéneru y estructura llibre qu’axuntaren les característiques del xéneru ensayísticu, entendíu na so amplitú.
La directora xeneral de Política Llingüística, Ana María Fueyo, presidió esti miércoles la xunta del xuráu, integráu polos escritores ya investigadores Naciu Llope, Xosé Antón Suárez Ponte y Luis Casteleiro Oliveros.
Ente les obres presentaes, el xuráu decidió por unanimidá conceder el Premiu al testu tituláu ‘Caleya Sésamu: el papel de la televisión na tresmisión interxeneracional de la llingua’, presentada sol seudónimu ‘Son Goku’, al destacar “la solidez documental y la bona estructuración d’una obra qu’analiza les posibilidaes de l’animación infantil como instrumentu favorecedor de les llingües minoritaries, avanzando propuestes concretes nel ámbitu de la normalización social de la llingua asturiana”, según destaca’l fallu.
Damián Barreiro (A Estrada, Pontevedra, 1984) ye periodista. En formando parte de la plantiya del desapaecíu selmanariu Les Noticies, collaboró con otros medios de comunicación asturianos, como la Televisión Llocal de Xixón, el periódicu Diagonal Asturies o’l diariu La Nueva España, na so estaya ‘Escolinos’. Nel añu 2013 ganó’l Premiu d’Ensayu Fierro Botas, convocáu pol Conceyu de Xixón, cola obra ‘L’espeyu onde miranos: televisiones de proximidá n’Europa Occidental y procesos de recuperación identitaria’.
(d’Europa Press, 12-11-2014)
Tierra alantre, la mesma fala 
Deixar ua Respuosta