La conseyera d’Educación, Cultura y Deporte, Ana González, anunció esti llunes que va siguir insistiendo al Gobiernu que preside Mariano Rajoy pa qu’exerza les sos competencies y cree la especialidá de profesoráu de Llingua Asturiana, y alvirtió que si la competencia ye autonómica, tal como plantegó l’Estáu, va solicitar que-y indique cuála ye la normativa que tien que desarrollar la Comunidá Autónoma.
“Esta negativa nun significa que vayamos tirar la toalla, vamos siguir con delles estratexes. La primer d’elles ye que si ellos nun lo reconocen, teniendo como tienen la competencia, que me digan qu’acordies con qué llexislación pue facelo la Conseyería”, señaló. La conseyera fizo estes declaraciones en participando na presentación de la digitalización de los catastros de Somiedu y Teberga.
Tocantes a la solicitú per parte de l’Academia de la Llingua de que’l presidente del Principáu asista a una negociación col ministru d’Educación, la conseyera aseguró que “dacuando la escenografía nun indica l’esfuerzu, nin la seriedá de les coses” y alvirtió que ye partidaria de conocer primero les razones de la negativa y forzar al Ministeriu a qu’una o otra alministración desarrolle la especialidá.
“Nun ye competencia de la comunidá autónoma y si ye competencia mía, que m’indiquen en qué norma s’indica que ye la mio mio competencia y la desarrollen, y si non, volveré pidi-yos qu’exerzan la so competencia”, añadió.
Amás, González recordó que nuna interpelación parlamentaria, desenvuelta na Xunta Xeneral del Principáu, el Partíu Popular votó en contra d’esta propuesta colo qu’igual mos alcontramos con un refugu ideolóxico”, plantegó.
(d’Europa Press, 19-01-2015)
Tierra alantre, la mesma fala 
Deixar ua Respuosta