Dellos servicios de normalización llingüística entamen la campaña ‘¿Ayúdote yo?’, cola intención d’innvolucrar a distintos grupos d’edaes na conservación y usu del asturianu. El mecanismu ye facer una recopilación de frases y espresiones típiques n’asturianu de la vida cotidiana pa posteriormente espardiles.
La iniciativa llévenla a cabu los servicios de normalización llingüística de la Mancomunidá d’El Cabu Peñes, Siero, Castrillón y Samartín del Rei Aurelio.
Pa ello, dende estos servicios propónse una actividá a les families, les escueles o cualesquier grupu de xente interesao pa qu’interactúen y aporten una esbilla de frases de les que suelen emplegar les madres o les güeles en delles ocasiones, y que yá formen parte de la nuestra vida cotidiana.
Pa ello creóse’l blog “llinguamaternaayudoteyo.blogspot.com” nel que se da información completa del proyeutu y se proponen una serie d’actividaes coles que puen trabayar les persones que s’animen a participar. Tamién s’ufierten dalgunos exemplos d’espresiones del tipu “Si te duel ye que ta curando”, “Pue más el güeyu que’l butiellu” o “¡Mira que pintes!” ente otres munches.
Espresiones asemeyaes son les que se van recoyer nesti proyeutu, y pa ello habilitáronse distintos medios, de manera que se van poder enviar eses frases per escrito, o tamién como archivos d’audiu o videu. Con tol material recoyío fadráse un videu recopilatoriu que se va estrenar coincidiendo cola Selmana de les Lletres Asturianes y el Día de la Madre y que, dependiendo del volumen de material recibío, publicaráse a lo llargo del mes de mayu.
(d’Asturias24, 04-03-2015)
Tierra alantre, la mesma fala 
Deixar ua Respuosta